Stuðmenn skála við Hreðavatn

Hinir lífseigu Stuðmenn bregða undir sig betri fótunum um helgina. Fjörið byrjar í dag þegar nýtt lag, Skál!, verður frumflutt á íslenskum útvarpsstöðvum og í framhaldinu skellir hljómsveitin sér í Borgarfjörðinn og treður upp í Hreðavatnsskála annað kvöld. "Ætli það megi ekki segja að þetta verði fyrsta sveitaball sumarsins," segir stuðmaðurinn Jakob Frímann Magnússon. "Við erum með þetta í fyrra fallinu núna þar sem við erum að fara utan eftir helgina." Stefnan er tekin á Þýskaland þar sem Stuðmenn ætla að slá í gegn í sumar með sérhönnuðu prógrammi. "Við ætlum að prufukeyra Þýskalandsprógrammið á Borgnesingum. Við byrjum á því og vindum okkur síðan í rammíslenska dagskrá." Jakob segir að hljómsveitin sé svo önnum kafin bæði í landvinningum og kvikmyndaframleiðslu að hún sjái sér aðeins fært að troða upp við sérstök tækifæri hér heima í sumar. "Seinni part sumars tekur við niðursuða hugmynda fyrir Stuðmannamyndina," segir Jakob en eins og frægt er orðið hefur hljómsveitin fengið Ágúst Guðmundsson, leikstjóra, til liðs við sig á ný með það fyrir augum að fylgja eftir einni vinsælustu íslensku bíómynd allra tíma Með allt á hreinu.