Peaches til Íslands

Bandaríska elektróclashdrottningin Peaches mun halda tónleika í listastöð Klink&Bank við Þverholtið, þriðjudagskvöldið 29. júní næstkomandi. Kanadamærin Peaches heitir réttu nafni Merrill Nisker og olli miklu fjaðrafoki með fyrstu breiðskífu sinni Teaches of Peaches eftir að platan var endurútgefin af Beggars XL-útgáfunni fyrir tveimur árum. Hún þykir sérstaklega opinská varðandi kynlíf í textasmíðum en tónlist hennar er mjög einföld, ögrandi og forritanir mjög naumhyggjulegar. Hún talar opinskátt um tvíkynhneigð sína í textum og er lítið fyrir boð og bönn. Í fyrra fylgdi hún frumraun sinni eftir með plötunni Fatherfucker þar sem m.a. Iggy Pop söng með í einu laganna. Það er skemmtileg tilviljun því sjálfri hefur henni verið lýst sem eins konar kvenkyns útgáfu af poppsöngvaranum. Tónleikar Peaches eru engu líkir. Hún er ein á sviðinu og býður upp á góða sýningu. Klæðir sig upp í búninga, skellir sér á áhorfendahópinn og lætur allt flakka í tjáningu sinni. Í kjölfarið hefur hún verið í uppáhaldi hjá tísku- og tónlistarblöðunum. Þrátt fyrir að útvarpsstöðvarnar treysti sér ekki ennþá til þess að leika lög hennar opinberlega hafa plötur hennar selst um allan heim, enda óhætt að segja að Peaches sé engri annarri lík.