19 látast vegna kulda í Tyrklandi

19 manns hafa látist af völdum kuldabola í Tyrklandi undanfarna viku. Nokkrir hafa beinlínis látist úr kulda, en aðrir hafa dottið í hálku eða látist óbeint af völdum frosthörkunnar sem ríkt hefur í Tyrklandi síðustu daga. Þá hafa nokkrir skólar neyðst til þess að leggja niður starfsemi síðustu tvo dagana, flugumferð hefur víða legið niðri og vegir til sveitahéraða eru lokaðir.

11 látnir eftir jarðskjálfta

Að minnsta kosti 11 létust og 65 eru slasaðir eftir að öflugur jarðskjálfti skók Indónesíu í morgun. Byggingar hrundu til grunna og eldur kviknaði í skjálftanum, sem mældist 6,4 á richter.

4 milljónir starfsmanna þarf

Fjórar milljónir alþjóðlegra heilbrigðisstarfsmanna til viðbótar þarf til ef heilsu fólks um gjörvallan heim á að fara fram næsta áratuginn. Þetta er mat hóps eitt hundrað yfirmanna úr heilbrigðisgeiranum víðs vegar um heiminn.

90 handteknir

90 manns hafa verið handteknir á Spáni vegna dreifingar á barnaklámi á netinu. Á meðal hinna handteknu voru kennarar, hermenn, verkfræðingar og háskólanemendur. Þetta er viðamesta rassía sem spænska lögreglan hefur gert í máli sem þessu. Alls var leitað á 87 heimilum, meira en hundrað tölvur gerðar upptækar og þúsundir geisladiska yfirfarnir.

Internet explorer meingallað

Tölvunotendur eiga að hætta að nota Internet explorer vafrann samkvæmt tölvusérfræðingum á Norðurlöndunum. Danska fyrirtækið Cert, sem sérhæfir sig í tölvuöryggismálum, segir mikla ágalla á Internet explorer, sem gefi óprúttnum aðilum möguleika á að leika tölunotendur grátt.

Jólasveinn skotinn

Vopnaður bankaræningi, íklæddur jólasveinabúningi lést í Þýskalandi í dag. Ræninginn hafði ásamt öðrum manni, sem einnig var klæddur sem jólasveinn, haft á brott með sér nokkrar milljónir króna, þegar til skotbardaga kom. Einn lögreglumaður slasaðist alvarlega, en sá jólasveinanna sem ekki varð fyrir skoti náði að flýja af vettvangi og er enn ófundinn.

Fundað um stöðuna

Víktor Janúkovítsj, forsætisráðherra Úkraínu, og Víktor Júsjenko, leiðtogi stjórnarandstöðunnar, sitja á fundi með fulltrúum Rússlands og Evrópusambandsins til að reyna að leysa deiluna um forsetakosningarnar. Janúkovitsj skorar á stuðningsmenn sína að koma í veg fyrir valdarán.

Heilinn skreppur saman

Ný rannsókn vísindamanna við Northwestern-háskólann í Chicago sýnir að heili þeirra sem búa við langvarandi sársauka og kvalir skreppur saman. Þetta er talið minnka getu þeirra til rökhugsunar og mannlegra samskipta.

Stakk átta nemendur til bana

Maður stakk átta nemendur til bana í heimavist framhaldsskóla í Ruzhou-borg í Henan-héraði í miðhluta Kína. Maðurinn fór inn í heimavist pilta um miðnætti í fyrrinótt og réðist á nokkra piltanna með hníf. Fjórir særðust til viðbótar þeim sem létust, þeirra á meðal tveir lífshættulega.

Semja um friðsamlega lausn

Mennirnir sem takast enn á um völdin í Úkraínu, tæpri viku eftir seinni umferð forsetakosninganna, samþykktu í gær að semja um friðsamlega lausn deilunnar sem hefur valdið uppnámi í Úkraínu. Viktor Janukovitsj forsætisráðherra og Viktor Júsjenko, leiðtogi stjórnarandstöðunnar, hittust í gærkvöldi á fundi með Leoníd Kútsjma, fráfarandi forseta.

Vinstriflokkurinn tapar enn

Vinstriflokkurinn sænski heldur áfram að tapa fylgi og mælist nú með lægsta fylgi sitt í áratug í skoðanakönnun sem Dagens Nyheter birti. Flokkurinn mælist með 6,5 prósenta fylgi.

Snákatemjarar hóta stjórnvöldum

Indverskir snákatemjarar hóta að sleppa baneitruðum snákum í þinghúsi indverska fylkisins Orissa ef yfirvöld þar halda fast í bann við snákasýningum á gangstéttum.

Skiptinemum fækkar vestanhafs

Erlendum skiptinemum í Bandaríkjunum hefur fækkað mikið á síðustu árum. Þeir voru nær 28 þúsund síðasta vetur, meira en helmingi færri en þeir voru veturinn 1993 til 1994 þegar þeir voru 62 þúsund talsins.

Íhuga að fresta kosningum

Íraska kosningastjórnin tekur afstöðu til þess í dag hvort fresta eigi kosningum í landinu. Til stendur að halda kosningar fyrir 30 janúar næst komandi en tíu stjórnmálaflokkar hvöttu í gær til þess að kosningunum yrði frestað um hálft ár.

Arfleifð Arafats skapar svigrúm

Forystumenn East-West Institute telja að Bandaríkin þurfi og muni treysta á bandamenn sína í baráttunni gegn útbreiðslu kjarnavopna. Þá segja þeir að arfleifð Arafats komi í veg fyrir að valdabarátta leiði til átaka í Palestínu muni skapa eftirmanni hans svigrúm til athafna.</font /></b />

Palestínumaður skotinn til bana

Ísraelskir hermenn skutu Palestínumann til bana á Gasa-ströndinni í morgun. Hermenn voru þar í leit að neðanjarðargöngum sem notuð eru til vopnasmygls. Ekki er ljóst á þessari stundu  hvort að maðurinn tengdist smygli eða hryðjuverkastarfsemi.

Boðað til allsherjarverkfalls

Boðað hefur verið til allsherjarverkfalls í Úkraínu til að mótmæla endanlegum úrslitum í forsetakosningum þar en yfirkjörstjórn sendi þau frá sér í gær. Slagsmál brutust út meðal þingmanna eftir að úrslitin voru kunngerð.

Fuglaflensa næsti heimsfaraldur

Næsti heimsfaraldur verður að líkindum af völdum fuglaflensu að mati sérfræðinga Alþjóða heilbrigðismálastofnunarinnar. Einn stofn fuglaflensu, H5N1, hefur reynst mannfólki banvænn og telja sérfræðingarnir að hann sé til þess fallinn að dreifast um heimsbyggðina og sýkjast á bilinu 25-30% jarðarbúa.

Háttsettir CIA-menn segja upp

Tveir háttsettir starfsmenn CIA-leyniþjónustunnar hafa sagt upp störfum vegna óánægju með yfirstjórn CIA. Ekki verður upplýst hverjir starfsmennirnir tveir eru þar sem þeir hafa unnið að leynilegum verkefnum en að sögn háttsettra manna innan leyniþjónustunnar er um lykilmenn að ræða sem stjórnað hafa aðgerðum í Evrópu og Mið-Austurlöndum.

Ekki lengur hræddir við að ferðast

Bandaríkjamenn eru ekki lengur hræddir við að ferðast innanlands eins og þeir voru fyrst eftir hryðjuverkaárásirnar 11. september 2001. Þakkagjörðarhátíðarhelgin nálgast nú óðfluga og þegar í gær voru langar raðir á flugvöllum og járnbrautarstöðvum þó að aðalferðadagurinn sé venju samkvæmt í dag, fimmtudag.

Óskaði Janúkóvits til hamingju

Vladímír Pútín, forseti Rússlands, óskaði í morgun Viktor Janúkóvits til hamingju með sigurinn í forsetakosningunum sem fram fóru í Úkraínu á sunnudag. Háttsettur fulltrúi rússneskra stjórnvalda hafði það eftir Pútín að sigur Janúkóvits skapaði kjöraðstæður fyrir samskipti ríkjanna tveggja.

80 uppreisnarmenn handsamaðir

Hundruð breskra hermanna réðust á bækisstöðvar meintra stuðningsmanna Saddams Hússeins nærri Bagdad í Írak í morgun en hersveitir hafa undanfarna daga reynt að knésetja uppreisnarmenn suður af höfuðborginni. Áttatíu Írakar voru handsamaðir og hald lagt á tæki sem talin eru vera til sprengjugerðar.

Mikill baráttuhugur í almenningi

Urður Gunnarsdóttir, talsmaður ÖSE, Öryggis- og samvinnustofnunar Evrópu, sem starfar við kosningaeftirlit í Úkraínu, segir mikinn baráttuhug í almenningi í landinu. Hún segir ástandið í Kænugarði ótrúlega gott miðað við ólguna í landinu. 

Górillan Lísa yngir upp

Górillan Lísa, sem býr í dýragarði í Jóhannesarborg í Suður-Afríku, hefur verið harmi slegin síðan hún missti maka sinn, Max, í maí í vor. En hún getur nú tekið gleði sína á ný. Górilluhjónabandsmiðlari hefur nefnilega fundið henni annan lífsförunaut, Makakó, sem verður fluttur frá Þýskalandi til Suður-Afríku á morgun.

Sprengjudrunur í Bagdad

Sprengjudrunur heyrast víða í Bagdadborg nú um stundir en engar fréttir hafa borist af særðum eða látnum. Öflug sprenging kvað við í miðborginni fyrir stuttu og fréttamaður Reuters í borginni segist sjá reyk stíga upp til himins norðan við Græna svæðið svokallaða þar sem meðal annars er aðsetur hernámsliðsins og bráðabirgðastjórnar Íraks.

Baráttudagur gegn ofbeldi á konum

Í dag er alþjóðlegur baráttudagur gegn ofbeldi á konum. Af því tilefni vakti Kofi Annan, framkvæmdastjóri Sameinuðu þjóðanna, athygli á því að ofbeldi gegn konum viðgengst um heim allan, í öllum þjóðfélögum og menningarheimum.

Tilraunastofa til efnavopnagerðar

Tilraunastofa til efnavopnagerðar hefur fundist í Fallujah-borg í Írak að sögn utanríkisráðherra landsins, Kassims Daouds. Hernámsliðið náði borginni á sitt vald, eða svo gott sem, á dögunum með því að ráðast gegn skæruliðum sem höfðu borgina í herkví og í kjölfarið uppgötvaðist þessi tilraunastofa.

Taílendingar hóta sniðgöngu

Forsætisráðherra Taílands segist munu ganga út af fundi Suðaustur Asíu ríkja í Laos í næstu viku vekji einhver máls á skærum í suðurhluta Taílands þar sem yfir 500 manns hafa fallið á þessu ári.

Íranar vilja undanþágur

Íranar vilja halda áfram að nota skilvindur, sem nota má til að auðga úran, þrátt fyrir samning við ESB um að hætta öllum tilraunum og þróun kjarnavopna. Íranar halda þvi fram að skilvindurnar séu ekki hluti af samningnum og þær eigi að nota í tilraunaskyni en ekki til að auðga úran.

Sprengjur finnast í Belfast

Sprengjusérfræðingar í breska hernum gerðu eldsprengju, sem fannst í verslun í miðborg Belfast, óvirka í gær. Sprengjufundurinn þykir benda til þess að IRA ætli sér að fremja ódæðisverk í jólaösinni. Starfsfólk verslunarinnar fann sprengjuna eftir lokun þegar það leitaði undir fatastæðum eftir ábendingar og viðvaranir lögreglu um aukna hættu á sprengjuárás.

Bannar birtingu kosningaúrslitanna

Hæstiréttur Úkraínu hefur bannað birtingu úrslita forsetakosninganna og skoðar kæru leiðtoga stjórnarandstöðunnar um kosningasvik. Urður Gunnarsdóttir, talsmaður ÖSE, segir mikinn baráttuvilja í almenningi í Úkraínu. 

Algjör óvissa ríkir í Úkraínu

Hæstiréttur Úkraínu fjallar á mánudaginn um áfrýjun Viktors Júsjenko forsetaframbjóðanda. Allt að 200 þúsund manns mótmæla á götum Kænugarðs. </font />

Mótmælin halda áfram

Mótmæli halda enn áfram í Úkraínu þar sem stór hluti almennings neitar að sætta sig við opinberar niðurstöður forsetakosninga á sunnudaginn var. Mótmælendum lenti saman við óeirðalögreglu í gær og umferð í Kænugarði stóð í stað.

Dan Rather hættir

Dan Rather, einhver þekktasti sjónvarpsfréttamaður Bandaríkjanna og aðalfréttaþulur CBS-sjónvarpsstöðvarinnar, mun láta af þeim starfa 9. mars næstkomandi, tuttugu og fjórum árum eftir að hann tók við starfanum af Walter Cronkite. Frá þessu var greint í gær.

Ofbeldisfyllri og feitari börn

Tölvuleikir valda því að bandarísk börn eru ofbeldisfyllri, feitari og bera minni virðingu fyrir öðrum en ella, samkvæmt niðurstöður nýrrar rannsóknar National Institute on Media and the Family þar vestra. Þar segir meðal annars að í tölvuleikjum kynnist börn kynlífi og ofbeldi án þess að þau séu fær um að átta sig á því hvað þar er á ferð.

Dómurinn var dómsmorð

Arne Haugestad, verjandi norska stjórnarerindrekans Arne Treholt sem árið 1985 var dæmdur í tuttugu ára fangelsi fyrir njósnir í þágu Sovétríkjanna, segir að dómurinn hafi verið dómsmorð. Hann hefur ekki tjáð sig um málið fyrr en nú að búið er að létta trúnaði af málsskjölunum.

HIV-smituðum fjölgar nokkuð

Tæplega fjörutíu milljónir manna eru smitaðar af HIV-veirunni samkvæmt nýrri ársskýrslu Sameinuðu þjóðanna sem birt var í morgun en alþjóðlegi alnæmisdagurinn er 1. desember næstkomandi. Smituðum hefur fjölgað nokkuð því fyrir tveimur árum var fjöldi HIV-smitaðra í heiminum tæplega 37 milljónir.

Óttast ofbeldi í Úkraínu

Javier Solana, forseti framkvæmdastjórnar Evrópusambansins, óttast að ofbeldi brjótist út í Úkraínu þar sem stór hluti almennings neitar að sætta sig við opinberar niðurstöður forsetakosninganna á sunnudaginn var. ÖSE, Öryggis- og samvinnustofun Evrópu, hefur lýst því yfir að svo virðist sem svik hafi verið í tafli við framkvæmd kosninganna.

Ætluðu að brenna kaupmanninn inni

Gerð var tilraun til að myrða kaupmann af asískum uppruna í verslun hans í Túnsbergi í Noregi í gærkvöldi. Árásarmennirnir, sem voru þrír, bundu kaupmanninn á höndum og fótum og kveiktu svo í versluninni en vegfarandi sá eldinn í tæka tíð og kallaði á björgunarlið sem náði kaupmanninum lifandi út.

Spengjuárás í Afganistan

Að minnsta kosti tveir bandarískir hermenn létust og einn særðist í sprengjuárás í Afganistan nú síðdegis. Árásin átti sér stað í Uruzgan-héraði í miðhluta landsins þar sem hermennirnir voru í eftirlitsför.

Atkvæðagreiðslan verði endurtekin

Annar forsetaframbjóðendanna í Úkraínu, Viktor Yushchenko, segist samþykkur því að atkvæðagreiðsla fari fram að nýju í forsetakosningunum þar í landi gegn því að utanaðkomandi aðili hafi eftirlit með framkvæmd hennar.

Rússi dæmdur fyrir njósnir

Rússneskur vísindamaður sem sakaður var um njósnir fyrir Kínverja var dæmdur í fjórtán ára fangelsi í Síberíu í dag. Hinn dæmdi, Valentin Danilov að nafni, var sakaður um að hafa selt kínverskum yfirvöldum viðkvæmar upplýsingar um rússneska herinn og vopn hans.

Brauðsneið seld á tvær milljónir

Tíu ára gömul ristuð brauðsneið var seld á tæpar tvær milljónir króna á uppboðsvefnum eBay. Það var spilavíti á netinu sem keypti brauðsneiðna á uppboðinu.

Chirac til Líbíu

Jacques Chirac, forsætisráðherra Frakklands, fer í opinbera heimsókn til Líbíu í næstu viku. Hann verður fyrsti franski stjórnmálaleiðtoginn til að heimsækja landið í 53 ár.

Serbnesk stjórnvöld gagnrýnd

Carla Del Ponte, aðalsaksóknari Alþjóðadómstólsins í Haag, gagnrýndi serbnesk stjórnvöld harðlega á fundi með fulltrúum öryggisráðs Sameinuðu þjóðanna.