Julebryg verði mun ó­dýrari

„Í Danmörku markar Julebryg upphaf jólanna. Fyrsta föstudag í nóvember, klukkan 20:59, kemur hann í sölu um allt land og Danir fagna deginum, sem þeir kalla J-dag, á börum og í heimahúsum. Hefðin hefur haldist frá 1990 og í ár ber J-dag upp á föstudaginn 6. nóvember,“ segir í fréttatilkynningu frá Santé.

Fyrirtækið hyggst setja jólabjórinn á sölu, sem einnig hefur notið töluverðra vinsælda á Íslandi, og selja hann á mun ódýrara verði. Einungis verður hægt að festa kaup á kassa og mun hann kosta rétt rúmar 4300 krónur. Í Vínbúðinni kostar kassinn rétt tæpar 5400 krónur.

„Julebryg er orðinn hluti af jólunum hjá mörgum Íslendingum, rétt eins og hjá Dönum. Okkur fannst sjálfsagt að bjóða hann eins og Danir drekka hann – beint frá Danmörku – og á verði sem munar um,“ er haft eftir Elíasi Blöndal Guðjónssyni, vínkaupmanni og öðrum eigenda Santé, í tilkynningu.

Mikið hefur verið fjallað um netsölu áfengis síðustu misserin en eigendur Sante sæta nú ákæru fyrir brot á áfengislögum og peningaþvætti. Mál gegn þeim var þingfest í september þar sem þeir neituðu sök. Eigendur Sante – þeir Arnar Sigurðsson og Elías Blöndal Guðjónsson – eru ákærðir fyrir að hafa borið ábyrgð á sölu áfengis án þess að félög þeirra hefðu leyfi til smásölu áfengis hér á landi.