Ís­lensku stelpurnar unnu Pól­verja eftir flotta endur­komu

Íslensku stelpurnar mæta Pólverjum tvisvar um helgina en þessi fyrri leikur liðanna fór fram fyrir luktum dyrum.

Elín Klara Þorkelsdóttir skoraði ellefu mörk fyrir Ísland og fór fyrir íslenska liðinu en þær Lilja Ágústsdóttir og

Sonja Lind Sigsteinsdóttir voru með fjögur mörk hvor.

Leikurinn var jafn og spennandi frá fyrstu mínútu. Pólland var marki yfir eftir tíu mínútna leik, 7–6, en íslenska liðið sneri taflinu við og var komið yfir, 11–12, eftir 20 mínútur. Pólverjar enduðu fyrri hálfleikinn betur og leiddu 17–16 þegar flautað var til hálfleiks.

Pólland byrjaði seinni hálfleikinn vel og var tveimur mörkum yfir, 24–22, eftir 40 mínútur og enn marki yfir, 29–28, þegar tíu mínútur lifðu leiks.

Á lokakaflanum sýndu stelpurnar okkar mikinn karakter, unnu síðustu tíu mínúturnar 7–3 og tryggðu sér 35–32 sigur.

Liðin mætast aftur á laugardag klukkan fjögur.