Ert þú með hug­mynd sem gæti bætt heilsu fólks?

Umsóknarfrestur er til og með 4. október og hægt er að sækja um á www.klak.is/health. KLAK health er þátttakendum að kostnaðarlausu.

KLAK health er viðskiptahraðall sem má hugsa um sem námskeið í því hvernig eigi að stofna, reka og efla nýsköpunarfyrirtæki í heilsutækni. Hraðallinn stendur yfir í fimm vikur og markmið hans er að hraða þróun nýsköpunarfyrirtækja umtalsvert og koma frumkvöðlum í tengsl við samstarfsaðila, viðskiptavini og fjárfesta.

Þetta er í annað sinn sem hraðallinn er keyrður og upplifun fyrri þátttakenda gefur góða mynd af því sem hann skilar. Þátttakendur nefndu að KLAK health hefði dregið úr óvissu í þróunarferlinu, stækkað tengslanet þeirra, aukið þekkingu og veitt þeim góða leiðsögn til að hraða framgangi fyrirtækja þeirra. „KLAK health skipti sköpum við að skerpa fókusinn hjá okkur og gaf okkur skýran vegvísi fyrir næstu skref. Hraðallinn var hvetjandi og afar fræðandi og veitti um leið einstakt tækifæri til að tengjast lykilfólki í íslenskri heilsutækni. Þetta er reynsla sem breytir miklu fyrir öll nýsköpunarfyrirtæki í heilsutækni,“ segir einn þátttakenda úr fyrsta hópnum.

Kynningarmyndband um fyrirkomulag og starfsemi KLAK health má nálgast hér

En hvað er heilsutækni?

Heilsutækni er í grunninn hvers kyns lausn sem nýtir tækni eða hugvit til að bæta heilsu fólks eða vellíðan. Lausnir geta því komið úr fjölbreyttum áttum en við skiptum þeim gróflega í fjóra flokka þegar kemur að KLAK health.

• Lækningatækni (e. MedTech): lækningatæki, greiningarbúnaður, ígræðslur og hugbúnaður sem telst til lækningatækja.
• Líftækni og lyfjaþróun (e. BioTech & Pharma): líftæknivörur, lyfjaþróun og stoðþjónusta við fyrirtæki í þessum geirum.
• Stafrænar heilsulausnir (e. Digital Health): hugbúnaður, gagnavinnsla, veflausnir, öpp og snjalltækjalausnir.
• Neytendalausnir (e. Consumer Health): vörur og þjónusta tengd forvörnum, vellíðan, geðheilbrigði og lífsstíl einstaklinga.

Upptalningin er ekki tæmandi. Ef þú ert með hugmynd eða vinnur að lausn sem bætir heilsu fólks, þá átt þú erindi í KLAK health. Lausnin þarf heldur ekki að vera langt komin. Hraðallinn er ætlaður aðilum sem eru snemma í þróunarferlinu, allt frá þeim sem eru á hugmyndastigi upp í teymi sem hafa þegar komið vöru á markað og leita leiða til vaxtar.

Fræðsla, leiðsögn og tengslanet

Á þeim fimm vikum sem hraðallinn stendur yfir fá þátttakendur sérhæfða fræðslu á uppbyggingu nýsköpunarfyrirtækja og aðgang að víðtæku tengslaneti sérfræðinga og reyndra frumkvöðla í heilsutækni.

Þátttakendur fá aðstoð við að gera viðskiptaáætlun og finna leiðir til að nálgast viðskiptavini. Þeir fá einnig fræðslu um sölu, markaðssetningu, hugverkaréttindi og fjármögnun. Sérstök áhersla er lögð á reglugerðar- og tæknikröfur sem skipta miklu máli fyrir fyrirtæki sem starfa í heilsutækni. Samhliða fær hvert teymi þrjá sérvalda mentora úr mentoraneti KLAK VMS sem styðja teymið og hjálpa því að koma verkefninu áfram. Mentoraþjónustan sækir innblástur og fyrirmynd til MIT Venture Mentoring Service hjá MIT háskólanum í Boston, en stofnunin hefur í 25 ár þróað sambærilegt kerfi fyrir frumkvöðla í sínu háskólasamfélagi með góðum árangri.

Þátttakendur fá þjálfun í að kynna lausnir sínar og tækifæri til að gera það á hinum ýmsu viðburðum á meðan hraðallinn stendur yfir. Hraðlinum lýkur svo á fjárfestadegi 25. nóvember, þar sem teymin stíga á svið fyrir fullum sal fjárfesta og lykilaðila í heilsutækni.

Ef þú ert með hugmynd sem gæti bætt heilsu fólks, sama á hvaða stigi hún er, hvetjum við þig til að sækja um í KLAK health á www.klak.is/health. Umsóknarfrestur er til og með 4. október.

Bakhjarlar KLAK health eru Landspítali, Heilbrigðisráðuneytið, Íslandsbanki, Helix, Securitas, Heilsuvernd, Lifa VC, Össur, Nox Medical, Frumtök og Lyfja.