Þrota­bú Play krefur Einar um skaða­bætur

Þetta kemur fram í skriflegu svari þeirra Arnars Þórs Stefánssonar og Unnar Lilju Hermannsdóttur, skiptastjóra þrotabúsins, við fyrirspurn Vísis.

„Skiptastjórar geta staðfest að mál hafi verið höfðuð á hendur flugvélaleigusölum hins fallna félags og fyrrum forstjóra vegna greiðslna til flugvélaleigusala í aðdraganda gjaldþrots. Farið er fram á riftun greiðslnanna og skaðabætur. Málin voru þingfest í héraðsdómi í dag, 29. september,“ segir í svarinu en hvorki er tekið fram hversu mikið Play greiddi flugvélaleigunni með hinum umdeildu greiðslum né hversu hárra skaðabóta er krafist.

Vinnunni miðar ágætlega en langt er í land

Í svarinu segir að vinnu við skipti þrotabúsins miði ágætlega. Skiptastjórar hafi lokið við að taka afstöðu til þeirra krafna sem lúta sérstökum forgangi og unnið sé að úrlausn þeirra ágreiningsmála sem hafa komið upp vegna þeirra. 

Fyrir utan málin á hendur Einar Erni og flugvélaleigunnu séu nú rekin þrjú riftunarmál fyrir dómstólum en þess skuli getið að slík mál hafi þurft að höfða í byrjun ágúst síðastliðins vegna málshöfðunarfresta í lögum. 

„Fyrirséð er að málarekstur kunni að taka einhvern tíma. Þá hafa skiptastjórar ýmis önnur verkefni með höndum sem heyra undir skipti af þessari stærðargráðu.“

Vilja hálfan milljarð frá Isavia

Einnig sé ágreiningsmál rekið fyrir héraðsdómi milli þrotabúsins og APA ehf. vegna veðsetningar á varahlutalager þrotabúsins. Önnur riftunarmál sem ekki hefur verið samið í séu gegn Rea ehf., Isavia ohf. og APA ehf. vegna greiðslu skulda vegna þjónustu í aðdraganda gjaldþrotsins.

Innherji greindi frá því í byrjun mánaðar að þrotabúið hefði stefnt APA ehf, eða Airport Associates, og tengdum félögum og krafist riftunar á greiðslum upp á samtals um 470 milljónir sem voru inntar af hendi í aðdraganda falls flugfélagsins. Rea er móðurfélag Airport Associates og er í eigu fyrrverandi stjórnarformanns Play og eins stærsta flugfélagsins, meðal annarra.

Þá kom fram í árshlutareikningi Isavia á dögunum að þrotabúið krefði hlutafélagið opinbera riftunar á greiðslum að fjárhæð 485 milljónum króna ásamt vöxtum og dráttarvöxtum, sem flugfélagið hafi greitt Isavia í aðdraganda gjaldþrots þess.

Ekki náðist í Einar Örn við vinnslu fréttarinnar.