Krónan frystir verð til ára­móta

Verðfrystingin miðast við almennt söluverð varanna 23. september. Verð varanna mun því ekki hækka á tímabilinu samkvæmt tilkynningu, jafnvel þótt innkaupsverð, flutningskostnaður eða aðrir kostnaðarliðir hækki. Skapist hins vegar svigrúm til verðlækkana, til dæmis vegna lægra innkaupsverðs eða styrkingar krónunnar, verður þeim ávinningi skilað áfram til viðskiptavina samkvæmt tilkynningunni.

Greint var frá því um helgina að Bera, móðurfélag Ölgerðarinnar, Danól, Gæðabaksturs, Kjarnavara og fleiri vörumerkja, hafi heitið því að hækka ekki verð framleiðsluvara sinna um áramótin, umfram verðbólgumarkmið Seðlabankans. Þá hefur SS einnig tilkynnt að þau fresti verðhækkunum til áramóta. 

Óskuðu viðbragða frá verðmótandi fyrirtækjum

VR, LÍV og Fagfélögin sendu verðmótandi fyrirtækjum bréf í síðustu viku og óskuðu svara um hvað þau ætli að leggja af mörkum svo að kjarasamningar geti haldið gildi sínu. Þó nokkur sveitarfélög, Kópavogur og Árborg, sem dæmi, hafa einnig tilkynnt að þau ætli að takmarka gjaldskrárhækkanir á tímabilinu. 

Í tilkynningu Króunnar kemur fram að með aðgerðinni vilji Krónan leggja sitt af mörkum til að lækka verðbólgu, auka stöðugleika og draga úr kostnaðarhækkunum á heimilin.

„Þótt matvara sé ekki helsti drifkraftur verðbólgunnar um þessar mundir teljum við mikilvægt að allir leggi sitt af mörkum til að skapa aukinn stöðugleika og styðja við lækkun verðbólgu og vaxta. Við viljum sýna það í verki og höfum því ákveðið að frysta verð á um 650 vörum sem skipta heimilin raunverulegu máli,“ segir Guðrún Aðalsteinsdóttir, framkvæmdastjóri Krónunnar, í tilkynningunni.

Fjölbreyttar vörur

Vörurnar spanna fjölbreyttar og algengar vörur fyrir daglegt líf heimilanna eða allt frá kjúklingabringum, hakki, beikoni, brauði og kartöflum yfir í pasta, haframjöl og kaffi. Frystingin nær einnig til nauðsynjavara á borð við eldhúsrúllur, salernispappír, uppþvotta- og þvottaefni, hreinlætisvörur og gæludýrafóður. Margar þessara vara eru meðal ódýrustu valkostanna í sínum vöruflokki og verða vörurnar merktar með „Fryst verð“ á rafrænum hillumiðum inni í verslun.

Krónan greip til sambærilegrar aðgerðar árið 2022 þegar verð var fryst á 240 vörum undir vörumerkjum Krónunnar og First Price. Nú nær frystingin til um 650 vöruliða undir merkjunum Krónan, Krónan Lífrænt, Krónan Ódýrt, First Price, Grön Balance og Gestus.

„Við viljum gefa viðskiptavinum vissu um að verð þessara vara hækki ekki út árið. Ef kostnaður okkar hækkar á tímabilinu tökum við þá hækkun á okkur, og ef forsendur skapast til verðlækkana munum við skila þeim áfram til viðskiptavina,“ segir Guðrún.

Ásta S. Fjeldsted og Magnús Kr. Ingason, forstjóri og framkvæmdastjóri fjármála- og rekstrarsviðs Festi, sem eiga Krónuna, fjalla um málið í aðsendri grein á Vísi í dag. Þar segja þau að íslensk heimili hafi búið við verðbólgu og háa vexti um langt skeið og að við endurskoðun kjarasamninga sé brýnt að fyrirtæki, stjórnvöld og aðrir sem hafa áhrif á verðlag leggi sitt af mörkum, eins og kostur er, til aukins verðstöðugleika.