Hart tekist á um fjár­lögin: „Hvað er að þessu liði?“

Daði Már Kristófersson, fjármála- og efnahagsráðherra, tók þátt í pallborði á fundi SFF undir yfirskriftinni Hærri skattar, glötuð tækifæri? ásamt þingmönnunum Örnu Láru Jónsdóttur, Samfylkingu, Hildi Sverrisdóttur, Sjálfstæðisflokki, og Sigríði Á. Andersen, Miðflokki.

Fundinn má sjá í heild sinni í spilaranum hér að neðan en pallborðsumræðurnar voru síðastar á dagskrá:

Eðli málsins samkvæmt kom nýkynnt fjárlagafrumvarp Daða Más til umræðu og Sigríður og Hildur voru mjög gagnrýnar á að ekki hefði verið farið í meiri niðurskurð í stað skattahækkana til þess að ná fram hallalausum fjárlögum.

„Ætlaði hún að kaupa happdrættismiða?“

Daði Már fékk þá orðið og sagðist ekki ætla að draga dul á það að hann hefði viljað ná fram meiri niðurskurði. Aðhaldið nú væri þó það mesta sem komið hefði fram í fjárlagafrumvarpi eftir efnahagshrun. Töluvert sársaukafullar aðgerðir hefði þurft til þess að skera meira niður.

„Það sem pirrar mig þó mest er það sem Hildur sagði hérna áðan, eða það sem er á bak við hennar orð. Að gangast ekki við þeirri ábyrgð sem fylgir því að eyða peningum sem voru ekki til, árum saman frá 2019, 20, 21, 22, 23, 24, 25. Endalaus halli á rekstri ríkissjóðs, alveg sama hvernig áraði, og láta síðan eins og sá reikningur endi einhvers staðar annars staðar en hjá íslensku þjóðinni. Hvað er að þessu liði? Það er bara ein leið til að fjármagna ríkissjóð. Ætlaði hún að kaupa happdrættismiða? Ég bara botna ekki í þessu,“ sagði hann.

Heilt flugfélag, Covid, stríð og jarðhræringar

Hildur benti Daða Má þá á að rekstur ríkisins hefði lengi vel verið í jafnvægi í tíð fyrri ríkisstjórnar. Ríkissjóður hafi til að mynda verið rekinn án halla árin 2016, 2017 og 2018.

„Man einhver hvað gerist 2019? Heilt flugfélag hvarf. Man einhver hvað gerist 2020? Jú, eitt stykki heimsfaraldur. Svo stríð, svo jarðhræringar. Beinn kostnaður hljóp á mörg hundruð milljörðum. Undir lok síðasta kjörtímabils var þáverandi ríkisstjórn komin á rétta leið. Vextir voru á niðurleið. Verðbólga var að fara niður. Þangað til að ný ríkisstjórn tók við og skipt um kúrs og við vitum hvar við stöndum núna í þeirri á.“

Spyr „hvar í helvítinu“ reikningurinn hefði átt að lenda

Þá sagði Daði Már að hann ætlaði ekki að deila um að áföll hefðu riðið yfir á undanförnum árum. 

„Það sem ég skil ekki er að þeir sem að tóku ákvörðunina um að fjármagna viðbrögðin með lánum haldi að þurfi ekki að borga þau til baka. Í hvaða heimi er það þannig? Og eru núna með böggum hildar yfir því að reikningurinn falli á þjóðina. Hvar í helvítinu átti hann að falla annars staðar þegar ríkissjóður rekur sig á lánum? Það gerist einfaldlega ekki öðruvísi. Það er eitthvað fundamental að í hagfræðiþekkingu þessara flokka sem halda að það sé hægt að skuldsetja ríkissjóð án neikvæðra afleiðinga fyrir almenning.“