Lakers selt fyrir metupphæð

Áætlað kaup­verð Kus­hner og Iger á Los Angeles Lakers er talið vera rúmir tólf milljarðar Bandaríkja­dala, sem er met­u­pp­hæð er varðar kaup­verð á íþrótta­liði á heims­vísu. Það gerir rúma 1.4 billjón íslenskra króna.

Kus­hner fer fyrir Thrive Capi­tal fjár­festingafélaginu sem átti að halda utan um tuttugu pró­senta hlut í FIFA, alþjóðaknatt­spyrnu­sam­bandinu, í áætlun for­setans Gianni Infantino sem féll ekki vel í kramið hjá knatt­spyrnu­hreyfingunni. Infantino neyddist að lokum til að draga þessa áætlun sína til baka.

Bob Iger er fyrr­verandi fram­kvæmda­stjóri Dis­n­ey en hann er einn af aða­l­eig­endum Angel City FC knatt­spyrnu­liðsins í NWSL deildinni í Bandaríkjunum en ís­lenska lands­liðs­konan Sveindís Jane Jóns­dóttir er leik­maður liðsins.

Kaup Kus­hner og Iger á Lakers vekur at­hygli fyrir margra hluta sakir en aðeins er um ár síðan að Mark Walter, núverandi eig­andi liðsins, keypti ráðandi hlut í þessu sögu­fræga félagi fyrir um tíu milljarða bandaríkjadala.

Kus­hner og Iger höfðu áður reynt að koma á lag­girnar NBA liði í Las Vegas en reyndist það erfitt. Nú virðast þeir vera að hreiðra um sig í næsta nágrenni í Los Angeles.

„Sem miklir aðdáendur NBA deildarinnar erum við mjög stoltir af því að fá tækifæri til þess að verða varð­menn Los Angeles Lakers, félags sem er eitt það sögu­frægasta á heims­vísu,“ segir í yfir­lýsingu frá Kus­hner og Iger.

Lakers hefur sau­tján sinnum orðið NBA meistari og einu sinni varð liðið meistari í NBL deildinni sem var for­veri NBA deildarinnar.

Einn ís­lenskur leik­maður hefur verið á mála hjá liðinu. Pétur Guð­munds­son sem varð á sínum tíma fyrsti ís­lenski körfu­knatt­leiks­maðurinn til að spila í NBA deildinni. Fjörutíu ár eru liðin frá því að hann gekk í raðir félagsins árið 1986 og var á mála hjá því til ársins 1987.

Stjórn NBA deildarinnar mun nú þurfa að yfirfara kauptilboð Kushner og Iger í Lakers og veita samþykki fyrir sölunni áður en hún gengur alveg í gegn. Það ferli gæti tekið nokkrar vikur.