„Ég er bara ó­geðs­lega sáttur með þetta“

Einar synti á 1:00.87 mínútu, tæpri hálfri sekúndu hraðar en hans besti tími frá því í fyrra, sem var 1:01.23 mín. Hann hafnaði í 33. sæti af 71 keppanda í greininni.

Einar var að vonum ánægður með sundið eftir að hafa komið til baka úr meiðslum.

„Ég vildi bara vera nálægt mínu besta og koma til baka frá meiðslum, en ég er bara ógeðslega sáttur með þetta,“ sagði Einar eftir sundið. Hann segir fyrri 50 metrana hafa verið sérstaklega góða.

„Mér leið ógeðslega vel fyrstu fimmtíu metrana, léttustu fyrstu fimmtíu sem ég hef tekið. Síðan var ég einhvern veginn bara dauður seinni fimmtíu, en ég náði aðeins að halda í og ná þessari bætingu,“ sagði Einar við SSÍ.

Snæfríður Sól Jórunnardóttir náði næstbesta árangri Íslendinganna þegar hún synti 100 metra skriðsund á 55,72 sekúndum og varð í 35. sæti af 54 keppendum.

Hólmar Grétarsson synti 400 metra fjórsund í morgun á 4:29.65 og hafnaði í 23. sæti af 26 keppendum. Hólmar var einnig ánægður með aðstæður í París. „Þetta er ein besta laug sem ég hef synt í,“ sagði Hólmar eftir sitt sund.

Í 100 metra skriðsundi syntu einnig Jóhanna Elín Guðmundsdóttir og Vala Dís Cicero. Jóhanna synti á 56,79 sekúndum og Vala á 56,95 sekúndum.

Birnir Freyr Hálfdánarson og Símon Elías Statkevicius kepptu í 50 metra flugsundi og syntu á 24,60 sekúndum og 24,70 sekúndum.

Snorri Dagur Einarsson synti 100 metra bringusund á 1:02.20 mín.

Keppni heldur áfram á morgun en þá keppa Jóhanna í 50 metra flugsundi, Birgitta Ingólfsdóttir í 100 metra bringusundi og Guðmundur Leo Rafnsson í 200 metra baksundi.