Sektir Neyt­enda­stofu á bílastæðafyrir­tækin „dropi í hafið“

Neytendastofa sektaði bílastæðafyrirtækin Parka Lausnir ehf. og EasyPark Ísland ehf. um hundruð þúsunda fyrir að tilgreina ekki kostnað á gjaldsvæðum nægilega vel.

Breki Karlsson formaður Neytendasamtakanna segir þessi fyrirtæki „síbrotafyrirtæki“ því þau eru nú að fá sektir og ákúrur fyrir að brjóta aftur á sér og gegn fyrri ákvörðun Neytendastofu.

„Það segir manni að annaðhvort er þeim alveg sama eða að þau eru það kærulaus að þessar sektir eru ekki að bíta,“ segir hann. Það geti verið að sektirnar séu ekki nógu háar eða að það sé hreinlega einhver pottur brotinn innan fyrirtækjanna og þau hafi ekki stjórn á sinni starfsemi.

Sigmar Vilhjálmsson, þáttastjórnandi Bítisins, bendir á að stjórnvaldssektin sem lögð er á Parka hafi verið um ein milljón en í ársreikningi megi sjá að hagnaður fyrirtækisins í fyrra hafi verið um 42 milljónir.

„Þetta er dropi í hafið,“ segir Breki og bendir á að að þessi brot sem sektar er fyrir nú varði aðeins upplýsingagjöf.

Hann segir Neytendasamtökin einnig hafa hvatt Neytendastofu til að taka betur á vangreiðslugjaldi sem þessi fyrirtæki leggja einnig á. Samtökin telja gjaldið ólöglegt því það sé ekki á höndum fyrirtækja að leggja sektir á fólk. Það séu innheimtulög og þessi vangreiðslugjöld rúmist ekki innan þeirra.

Fá meira svigrúm með nýjum lögum

Breki segir ný markaðssetningarlög hafa tekið gildi í júní og eftir það hafi Neytendastofa meira svigrúm til að skoða þessi mál og því voni Neytendasamtökin að nú geti Neytendastofa skoðað þetta gjald. Þau telji að annaðhvort sé þetta brot á innheimtulögum eða á samningagerð, það er, samningurinn sé ósanngjarn.

Spurður hvort hann telji að eigendur eða stjórnendur eigi að vera gerðir persónulega ábyrgir fyrir svona brotum segir Breki að fyrirtækin taki ekki ákvarðanir, það séu stjórnendur innan þeirra sem geri það og það sé gott að þeir séu persónulega ábyrgir. Hann telur að öðruvísi ákvarðanir væru teknar innan fyrirtækja ef það þyrfti sjálft að standa skil á gjörðum sínum.

Erfitt að kvarta

Breki segir Neytendasamtökin fá margar athugasemdir um það að erfitt sé að ná til fyrirtækjanna. Fólk nenni ekki að standa í margra daga þrasi vegna sektar sem er kannski 2.500 eða 5.000 krónur. Það greiði hana frekar.

„Fólk vill ekki sjá svona í heimabankandum, það er óþægilegt og þetta er dæmigert neytendamál. Margir litlir aðilar eiga í baráttu við einn stóran sem hefur hag af því að taka smotterí af hverjum og einum,“ segir hann og þess vegna sé mikilvægt að samtökin berjist í þágu neytenda gegn þessu.

Hann segir Neytendasamtökin brýna Neytendastofu til harðari og frekari verka. Sektirnar séu gott fyrsta skref en það þurfi að stíga harðar og fastar niður.

„Við erum enn í þessu villta vestri.“