Hituðu upp fyrir heimsleikana í CrossFit með því að trú­lofa sig

Þau skötuhjúin gerðu þessa heimsleikaviku enn eftirminnilegri með því að byrja hana á því að trúlofa sig.

Medeiros fór niður á skeljarnar og bað Turner á einni æfingu þeirra fyrir heimsleikana.

„Æfingafélagar út ævina,“ skrifaði Ellie Turner við mynd af unnusta sínum á hnjánum fyrir framan hana.

Medeiros, sem er frá Bandaríkjunum, komst á heimsleikana með því að ná einu af sjö sætum í boði á lokaundanúrslitamótinu en Ellie Turner, sem er frá Ástralíu, tryggði sér farseðilinn á Torian Pro-undanúrslitamótin í Brisbane í Ástralíu.

Hinn 27 ára gamli Medeiros vann heimsleikana 2021 og 2022 og vann bronsverðlaun á heimsleikunum 2020. Hann endaði í sjöunda sæti í fyrra og áttunda sæti árið áður.

Hin 31 árs gamla Turner var að komast á heimsleikana í fyrsta sinn síðan 2023 en besti árangur hennar á leikunum er átjánda sætið árið 2022.

Fyrir áhugasama má sjá hvernig bónorðið gekk fyrir sig á YouTube-síðu Justin Medeiros en þátturinn fékk nafnið „Stærsta stundin fyrir CrossFit-leikana.“

Hann fékk hana til að taka létt hlaup með sér og kom henni síðan á óvart með bónorði.