Ís­lensk dóttir á heimsleikunum í fyrsta sinn í þrjú ár

Bergrós endaði þar í sjöunda og síðasta sætinu sem gaf þátttökurétt á heimsleikunum sem fara fram í San Jose í Kaliforníu-fylki í Bandaríkjunum frá 24. til 26. júlí næstkomandi.

Bergrós var lengi í níunda sæti en hækkaði upp um tvö sæti eftir að tvær fyrir ofan hana fengu á sig refsingu. Keppendur þurftu að skila myndböndum með æfingunum í gegnum netið og þau voru síðan yfirfarin.

Bergrós fékk allar sínar æfingar samþykktar en aðrir voru ekki í sömu sporum og mistök þeirra urðu til þess að heimsleikasætið rann þeim úr greipum.

Bergrós verður því með á heimsleikum fullorðinna í fyrsta sinn á ferlinum en hún hefur keppt þrisvar á heimsleikum unglinga.

Bergrós er nítján ára gömul og hefur tekið mörg risastór skref á síðustu árum á leið sinni í hóp bestu CrossFit-kvenna heims.

Bergrós keppir nú á heimsleikunum seinna í þessum mánuði þar sem samkeppnin verður frá 29 öðrum CrossFit-konum en í kvennaflokki koma keppendur frá ellefu þjóðum.

Ísland hafði ekki átt dóttur á síðustu tveimur heimsleikunum en þar á undan var íslensk dóttir á fimmtán heimsleikum í röð eða frá því að Anníe Mist Þórisdóttir keppti fyrst árið 2009.

Frá 2009 til 2023 átti Ísland keppendur í kvennaflokki en flestar voru þær fimm á heimsleikunum árið 2019 þegar þar kepptu Anníe Mist, Katrín Tanja Davíðsdóttir, Þuríður Erla Helgadóttir, Sara Sigmundsdóttir og Oddný Eik Gylfadóttir.

Þetta verða afmælisheimsleikar enda þeir tuttugu í sögunni. Það var vel við hæfi að þjóð sem á fjóra af nítján heimsmeisturum sögunnar ætti þar að minnsta kosti einn keppenda í kvennaflokki.