Nýir kælar og kjúklingastaður í Lindunum eftir stærstu endur­bætur Krónunnar

Um er að ræða umfangsmestu framkvæmdir sem Krónan hefur ráðist í til þessa, samkvæmt upplýsingum frá fyrirtækinu. Verslunin í Lindum er jafnframt sú stærsta í rekstrinum, um 3.200 fermetrar að stærð, og hefur verið starfrækt frá árinu 2008.

Við framkvæmdirnar var verslunin tekin í gegn og skipulagi hennar breytt. Nýr umhverfisvænn CO₂-kælibúnaður hefur verið tekinn í notkun í stað eldra kerfis sem notaði freon. Þá hefur lýsing verið endurnýjuð, grænmetisdeild stækkuð, aukið pláss verið gert fyrir lífrænar vörur og aðgengi að glútenlausum vörum bætt.

Starfsaðstaða starfsfólks og lagerrými hafa jafnframt verið endurnýjuð og bætt verulega.

Sérstök áhersla hefur verið lögð á aðgengi og notendavænni lausnir. Sjálfsafgreiðslukössum hefur verið fjölgað úr níu í fimmtán og ný tegund kassa tekin í notkun, meðal annars með þarfir sjónskertra og notenda hjálpartækja í huga. Krónan í Lindum var fyrsta verslunin hér á landi til að taka upp sjálfsafgreiðslukassa þegar hún opnaði árið 2008.

Samhliða enduropnuninni opnar nýr kjúklingastaður, Tjikký, í versluninni. Með opnuninni snýr jafnframt aftur kjúklingatilboð sem lengi hefur verið tengt versluninni í Lindum.

Guðrún Aðalsteinsdóttir, framkvæmdastjóri Krónunnar, segir að markmiðið hafi ekki aðeins verið að endurnýja verslunina heldur einnig að gera hana umhverfisvænni, aðgengilegri og þægilegri fyrir viðskiptavini og starfsfólk.

„Verslunin í Lindum er okkar stærsta verslun og því var mikilvægt að nýta þetta tækifæri til að þróa hana áfram í takt við breyttar þarfir viðskiptavina. Við höfum lagt mikla vinnu í að bæta flæði, styrkja umhverfisvæna þætti rekstrarins og skapa betri aðstöðu fyrir bæði viðskiptavini og starfsfólk. Við hlökkum til að heyra viðbrögð við breytingunum og sjá verslunina lifna við á ný,“ segir Guðrún.