Icelandair hafði betur gegn ósáttum aðdáanda Oasis

Kolbeinn Tumi Daðason skrifar 24. maí 2026 10:02

Fólk skolar niður bjór, reykir sígarettu og mögulega í leit að miðum við Heaton Park fyrir tónleikana síðasta sumar. Getty/Christopher Furlong

Íslendingur sem skellti sér á tónleika Oasis í Manchester í pakkaferð Icelandair á ekki rétt á endurgreiðslu þrátt fyrir að afhending á tónleikamiðanum hafi farið fram síðar en boðað hafði verið. Flugfélagið bauð tónleikagestinum inneign í sárabætur en því boði var ekki svarað.

Uppi varð fótur og fit þegar bresku rokkhundarnir í Oasis tilkynntu um tónleikaferðalag sitt fyrir árið 2025. Icelandair bauð upp á pakkaferð til Manchester í júlí það ár í heimaborg sveitarinnar en troðið var upp á Heaton Park.

Íslendingur sem greiddi 196 þúsund krónur fyrir flug og miða varð stressaður þegar tölvupóstur sem átti að innihalda miðann barst daginn fyrir tónleikana. Hann var þá mættur til Manchester og fylltist kvíða þegar ekkert viðhengi fylgdi tölvupóstinum. Hann var miðalaus og sólarhringur í tónleika.

Aðdáendur Oasis mættir á Heaton Park þann 11. júlí í fyrra. Sól og blíða og spennan mikil enda þá liðin sextán ár síðan Oasis lagði upp laupana með dramatískum hætti. Getty/Christopher Furlong

Hann lýsir því að hafa ekki náð sambandi við neinn hjá Icelandair fyrr en á tónleikadegi og barst miðinn honum 14:14 þann dag. Tónleikasvæðið var opnað klukkan 15, upphitunarsveit taldi í klukkan 18 og svo mætti Oasis á svið klukkan 20:15. Tónleikagesturinn sagði að vegna vesensins hefði hann misst af hluta tónleikanna. Ferlið hefði valdið honum verulegum óþægindum og haft neikvæð áhrif á upplifun hans af ferðinni og tónleikunum. Hann gerði því kröfu um fulla endurgreiðslu ferðarinnar.

Icelandair viðurkenndi að miðinn hefði borist seint en þó ekki komið í veg fyrir að viðkomandi gæti sótt tónleikana. Hann hefði raunar getað nýtt sér alla þá þjónustu sem innifalin var í pakkaferðinni og hafnaði kröfu um sáttargreiðslu. Bent var á að manninum hefði verið boðin inneign sem sáttaboð en því boði hefði ekki verið svarað.

Tónleikagesturinn leitaði réttar síns fyrir kærunefnd vöru- og þjónustukaupa. Nefndin benti á að Icelandair hefði lofað miðaafhendingu í síðasta lagi 24 klukkustundum fyrir tónleikana og óumdeilt væri að það hefði ekki staðist. Um leið væri ljóst að maðurinn gat mætt á tónleikana. Drátturinn hefði ekki verið þess eðlis að um verulega vanefnd hefði verið að ræða sem réttlætti endurgreiðslu. Raunar þótti drátturinn ekki vanefnd sem þýddi að maðurinn ætti rétt á afslætti frá Icelandair. Var kröfu hans því hafnað.

Icelandair Ferðalög