Sektir rafrettukóngs og eig­anda sölu­turns lækkaðar veru­lega

Snorri, sem hagnast hefur ævintýralega á sölu hinna ýmsu nikótínvara á síðustu árum, var ákærður fyrir stórfelld tollalagabrot í félagi við Sverri og þriðja mann. Þeim var gefið að sök að hafa komist undan greiðslu 741 milljónar króna í tóbaksgjöld af innflutningi um einnar milljónar pakka af vindlingum.

Snorra og Sverri var gefið að sök að hafa framið stórfelld brot gegn tollalögum og lögum um gjald af áfengi og tóbaki, með því að hafa í sameiningu í níu tilvikum, á árunum 2015 til og með 2018, veitt íslenskum tollyfirvöldum rangar og villandi upplýsingar þegar Áfengi og tóbak ehf., flutti inn reyktóbak og vindlinga frá Grand River Enterprises GmbH, Þýskalandi, Overseas Distribution Company N.V., Belgíu og Mac Baren Tobacco Company A/S, Danmörku.

Héraðsdómur Reykjavíkur dæmdi þá í tveggja ára skilorðsbundið fangelsi og til greiðslu 1,1 milljarðs hvor í febrúar í fyrra.

Með dómi Landsréttar í gær var refsing þeirra staðfest hvað varðar fangelsisdóminn en sektirnar voru lækkaðar í 741 milljón króna hvor. Þannig greiða þeir sekt sem nemur tvöfaldri þeirri upphæð sem þeir komu sér undan að greiða í stað þrefaldrar.