„Ég er ekki vanur að setja á mig spádómshattinn“

Peningastefnunefnd Seðlabanka Íslands gefur á morgun út yfirlýsingu sína um vaxtaákvörðun. Greiningaraðilar gera fastlega ráð fyrir því að stýrivextir verði þá hækkaðir.

Lillý Valgerður Pétursdóttir fréttamaður ræddi stýrivaxtaákvörðunina á morgun við fjármálaráðherra að loknum ríkisstjórnarfundi í morgun.

Heldur þú að þær aðgerðir sem þið hafið gripið til dugi til að koma í veg fyrir frekari stýrivaxtahækkanir?

„Það er ekki gott að segja. Við höfum auðvitað gert það sem ríkið getur gert, sem er að koma rekstri ríkissjóðs í jafnvægi og styðja þannig almennt séð við aðgerðir Seðlabankans. Síðan réðumst við í sértækar aðgerðir sem sneru að þessu áfalli sem stríðsátökin í Persaflóa hafa valdið, sem við vitum að mun hafa áhrif á vísitölu neysluverðs til lækkunar.“

Hægir á en verðbólga enn mikil

Á sama tíma bendi töluvert magn upplýsinga til þess að nú hægi á íslenska hagkerfinu. Það allt saman tali fyrir minni breytingum á stýrivöxtum. 

„Það er hins vegar alveg ljóst að verðbólgan er meiri en við hefðum viljað sjá og það talar fyrir hærri stýrivöxtum.“

Hverju áttu von á á morgun?

„Ég er ekki vanur að setja á mig spádómshattinn en einhverjar breytingar til hækkunar kæmu mér ekki á óvart.“

Of mikil kólnun ekki af hinu góða

Þá segir hann að Seðlabankinn sé í eðli sínu varfærin stofnun og því ætti hann erfitt með að rökstyðja vaxtalækkun á næstunni, sé litið til verðbólguvæntinga á markaði. Hins vegar sé það þannig að horfa þurfi mjög vandlega til þess hversu mikla hægingu hagkerfið þoli án þess að kostnaðurinn af henni verði meiri en hægt sé að sætta sig við.

Hvað ertu að tala þá um?

„Ef að hægir á íslenska hagkerfinu, þá kemur það auðvitað fram í atvinnuleysi, verri afkomu fyrirtækja, ekkert af þessu viljum við sjá af því að þetta eru þá neikvæðir hlutir í lífi fjölda Íslendinga sem að auðvitað við viljum reyna að forðast og það er bara þannig að ákvarðanir Seðlabankans taka langan tíma að koma fram. Þess vegna þarf að beita þeim með svona framsýnu auga, horfa fram í tímann og hugsa: eru afleiðingarnar af þessu réttlætanlegar til að ná niður verðbólgu ef þær valda neikvæðum áhrifum á líf Íslendinga?“