Grinda­vík - Njarð­vík 68-72| Njarð­vík tryggði sér odda­leik

Grindavík tók á móti Njarðvík í fjórða leik liðana í undanúrslitum Bónus deild kvenna í HS Orku höllinni í kvöld. Grindavík gat tryggt sig í úrslit með sigri á meðan Njarðvík varð að vinna til að fara í leik fimm.

Eftir mikla dramatík náði Njarðvík að tryggja sér leik fimm með frábærum fjórða leikhluta þar sem þær héldu Grindavík í þremur stigum og fóru með fjögurra stiga sigur 68-72.

Leikurinn fór fjörlega af stað og voru bæði lið að fljót að setja stig á töfluna. Farhiya Abdi var gríðarlega öflug í liði Grindavíkur og raðaði niður stigum í upphafi og var kominn með 12 stig eftir rúmlega fimm mínútna leik fyrir Grindavík.

Það var skotsýning milli liðana þar sem þristarnir flugu á milli. Það var því við hæfi að fyrsti leikhluti skyldi vera lokaður með einum slíkum frá Dani Rodriguez og Njarðvík leiddi eftir fyrsta leikhluta 27-30.

Grindavík byrjaði annan leikhluta af miklum krafti og voru snemma búnar að ná yfirhöndinni í leiknum. Farhiya Abdi var þar fremst í flokki og var búin að koma 20 stigum á töfluna fyrir Grindavík um miðjan leikhluta.

Njarðvík barði aðeins frá sér undir lok leikhlutans en Grindavík fóru með forystu inn í búningsklefa í hálfleik. Farhiya Abdi sem átti flautu þrist sem tryggði Grindavík í átta stiga forystu 50-42 í hálfleik.

Grindavík mætti mun grimmari til leiks í seinni hálfleiknum og réðu lögum og lofum. Þær náðu að stöðva allt það sem Njarðvík ætlaði sér og voru að koma góðum stigum á töfluna að auki.

Heimakonur náðu mest tólf stiga forskoti þegar best lét í leikhlutanum en Njarðvík náði að koma leiknum í átta stig fyrir lok leikhlutans 65-57.

Það var mikil spenna í fjórða leikhluta og maður sá fljótt að hvert kerfi fór að telja aðeins meira og hvert stopp, hvert stig taldi örlítið meira.

Varnarleikur Njarðvíkur small fullkomlega í fjórða leikhluta og þær héldu Grindavík í þremur stigum og náðu að snúa leiknum sér í vil og tryggðu sér oddaleik með fjögura stiga sigri 68-72.

Atvik leiksins

Varnarleikur Njarðvíkur í fjórða leikhluta. Þær halda Grindavík í þremur stigum sem er nánast óheyrt. Frábærlega gert hjá Njarðvík sem tryggði sér oddaleik á þriðjudaginn.

Stjörnur og skúrkar

Danielle Rodriguez var öflug í liði Njarðvíkur og endaði með 24 stig en hún tók einnig 13 fráköst og gaf 5 stoðsendingar.

Farhiya Abdi var frábær í fyrri hálfleik fyrir Grindavík en dró aðeins af henni í seinni. Endaði stigahæst á vellinum með 28 stig.

Dómararnir

Kristinn Óskars, Bjarki Þór og Davíð Kristján voru dómarar leiksins í kvöld. Skiptar skoðanir með þeirra frammistöðu í kvöld en eigum við ekki bara að segja að þetta hafi verið fínt og setja punktinn þar.

Stemning og umgjörð

Það var hörku mæting í HS Orku höllina í kvöld. Myndaðist flott stemning. Ánægjulegt að sjá Njarðvíkingana sem fjölmenntu í kvöld og fylltu sitt hólf.

Viðtöl

„Á sama tíma og ég er stoltur af stelpunum þá er ég fáránlega stoltur af fólkinu okkar“

„Ég er alltaf stoltur af þessum stelpum en ég held að ég hafi ekkert oft verið stoltari en í dag“ sagði Einar Árni Jóhannsson að vonum ánægður eftir sigurinn í kvöld.

„Varnarleikurinn hérna í síðari hálfleik, við gerum að mér finnst alveg ágætlega í þriðja varnarlega. Það vantaði svona sóknarfráköst“

„Fjórði leikhlutinn þá bara læsum við þessu. Sýnum bara hvað okkur langaði þetta mikið. Þær skora þrist þegar það eru níu og tuttugu eftir af leikhlutanum og skora svo ekki eftir það. Það er sigurinn“

„Sóknarlega þá eigum við mikið inni en á sama tíma og ég er stoltur af stelpunum þá er ég fáránlega stoltur af fólkinu okkar“

„Þvílík stemning og Njarðvíkingur er ekki heima á þriðjudaginn“ sagði Einar Árni Jóhannsson.

„Ógeðslega ósáttur við hvernig við koðnum bara niður í einhverjum aumingjaskap“

„Ástæðan fyrir því að við töpum gerir þetta bara meira svekkjandi“ sagði Þorleifur Ólafsson þjálfari Grindavíkur svekktur eftir tapið.

„Aumingjaskapur í mínum stelpum að vera ekki meiri töffarar og klára þetta. Þetta er á okkur og þær hérna á gólfinu, ég tala um töffaraskap þar en ég get líka klárlega gert betur“

„Eftir hvern einasta leik þá geta bæði leikmenn og þjálfarar gert betur. Ég er mjög ósáttur við hvernig við koðnum niður“

„Njarðvík voru náttúrlega bara upp við vegg og þær bara 'heyrðu, við erum bara að fara tapa þessu og fara í sumarfrí eða fá fimmta leikinn' og við bara 'já, þetta er bara körfuboltaleikur og skiptir ekki máli'“

„Ég er bara ógeðslega ósáttur við hvernig við koðnum bara niður í einhverjum aumingjaskap. Þetta var alls ekki gott“ sagði Þorleifur Ólafsson.