„Þetta er ekki græðgi“

Unnið er að því að koma upp sjálfvirkri númeraplötugreiningu við innkeyrslur Egilshallar. Þar mun mega leggja gjaldfrjálst í allt að þrjár klukkustundir en eftir það byrjar mælirinn að tikka.

Í húsinu er ýmis starfsemi, til að mynda kvikmyndahús, skautahöll, keilusalur, líkamsrækt, sjúkraþjálfun og fleira. Þrátt fyrir sjö hundruð bílastæði fyrir utan höllina þá fyllist planið á háannatíma. 

Vinnuvélar skildar eftir

Af stæðunum sjö hundruð eru hundrað forgangsstæði sem eru nær höllinni sjálfri. Gjaldfrjálst verður fyrstu fimmtán mínúturnar í þau og rukkað eftir það. Stæðin eru hugsuð fyrir þá sem ætla að stoppa stutt en of oft leggur fólk í lengri heimsóknum þar. Þá fyllist stæðið fljótt þegar fólk leggur þar ferðavögnum, langferðabílum og vinnuvélum þar til lengri tíma, eins og gerist svo oft að sögn Péturs Rúnars Heimissonar, samskiptastjóra Heima sem á húsið. 

„Við erum að sjá að það er erfitt að komast að á háannatíma. Við trúum að þetta muni tryggja betri upplifun við að koma að húsinu,“ segir Pétur. 

Öryggismál

Börn séu mikið í húsinu og þá þurfi að huga að öryggi.

„Til að mynda þegar hér eru stór íþróttamót fyllast stæðin. Þá viljum við ekki að bílar séu hringsólandi alveg upp við húsið þegar úti er myrkur á veturna,“ segir Pétur. 

Engin græðgi

Skoðað verður að bregðast við í takt við þarfir gesta, líkt og þegar bíómyndir eru lengri en þrír tímar. Í hverfishóp Grafarvogs segjast sumir íbúar ætla að sleppa því að sækja höllina eftir breytingu. Verið sé að drepa starfsemina þar. Pétur segir breytingarnar gerðar í sátt við rekstraraðila í húsinu.

„Við erum að byrja og eigum eftir að skoða kerfið. Sjá hvernig umferðin er. Við munum fá raungögn úr þessu kerfi þannig við getum alltaf séð hvað þjónar meirihlutanum,“ segir Pétur. 

Þannig þetta er verk í vinnslu?

„Þetta er verk í vinnslu og er fyrst og fremst þjónustuverkefni. Ekki gjaldskylduverkefni.“

Þetta er engin græðgi?

„Þetta er ekki græðgi.“