Segir svindl að karfa Kára standi: „Ég upp­lifi þetta sem al­gjöra þvælu“

„Það er mjög svekkjandi að þessi þriggja stiga karfa hafi verið gild,“ sagði Daníel í viðtali við Andra Má Eggertsson og talaði hreint út.

Körfuna náði Kári að skora með því að grípa boltann og taka þriggja stiga skot, þó að hann hefði aðeins 0,4 sekúndur til þess, en körfuna má sjá hér að neðan.

Daníel segir þetta einfaldlega ekki vera hægt. Tíminn sé ekki nægur.

„Nei, það finnst mér ekki. Ég er búinn að horfa á þetta aftur og mér þykir það ekki,“ sagði Daníel. Eina leiðin til að skora á svona litlum tíma sé með því að boltanum sé kastað beint úr innkasti að körfuhringnum og honum blakað í körfuna.

„Við vissum að það væri bara „tip in“ sem myndi ganga upp. Að henda boltanum á hringinn og tippa honum ofan í. Aldrei að fara að grípa og skjóta. Það er ekki séns,“ sagði Daníel og minntist þá sérstaklega á dómarann Jóhannes Pál Friðriksson.

„Ég bara skil ekki. Það var annar leikur sem Jóhannes var að dæma, Njarðvík gegn Tindastóli kvennamegin, þar sem það var gefinn allt of mikill tími á klukkuna að mínu mati. Ég er búinn að ræða það við formann dómaranefndar og svo lendum við í því nákvæmlega sama hér. Verið að gefa einhvern aukatíma. Ég veit ekki með það en að grípa og koma þriggja stiga skoti, á 0,4 sekúndum, ég á erfitt með að trúa því.“

Ræddi Daníel þá við dómarana á Hlíðarenda og fékk einhverjar skýringar?

„Nei þeir hlaupa bara út eftir hvern leik og það er ekki hægt að eiga samskipti við þá. Ég upplifi þetta sem algjöra þvælu. Ef fróðari menn segja að þetta geti gerst á þessum tíma þá má endilega senda mér það. Ég á mjög erfitt með að sjá það gerast mér finnst vera stuldur hér í kvöld, með þessu. Það er ekki tekið af Valsmönnum að þeir voru góðir hér í kvöld heilt yfir en mér fannst við gera nóg til að vinna þennan leik og þess vegna er þetta mjög svekkjandi.“

Viðtalið við Daníel má sjá í spilaranum hér að ofan.

Keflvíkingar eru nú einu tapi frá því að fara í sumarfrí en geta jafnað einvígið í 2-2 á miðvikudaginn, í Reykjanesbæ.