„Galið“ að Stjörnu­menn spili sig sem fórnar­lömb

KR jafnaði einvígi liðanna í stöðuna 1-1 með sigri á heimavelli á mánudaginn síðastliðinn. Eftir leik lét Baldur Þór Ragnarsson, þjálfari Stjörnunnar, í ljós óánægju sína með dómgæsluna í leiknum. 

Máli sínu til stuðnings benti Baldur viðtalsmanni Vísis á fjölda vítaskota sem hvort lið fékk í leiknum. KR fékk 29 vítaskot, Stjarnan átta. Þegar að villufjöldi liðanna er svo skoðaður má sjá að Garðbæingar voru duglegri við að safna villum. Alls 25 villum á móti 17 villum KR-inga.

Ekkert óeðlilegt á ferðinni

Jakob Örn, þjálfari KR, tekur ekki undir gagnrýni Baldurs og telur í raun ekki hægt að bera saman tölfræði eins og þessa og ætlast til þess að hún sé eins hjá báðum liðum.

„Við spilum ekki sama varnarleik og Stjarnan,“ segir Jakob í samtali við Vísi. „ Þeir sem fylgjast með þessum leikjum sjá að þegar Stjarnan er að spila vörn þá eru þeir mjög harðir. Þeir brjóta mjög mikið. Ýta og halda. Brjóta af sér í nánast hverri einustu vörn. Á sama tíma væla þeir og tuða þegar það er dæmt á þá. Reyna að hafa áhrif þannig. Heilt yfir eru þessi tvö lið ekki að spila sama varnarleikinn. Því held ég að það sé ekkert óeðlilegt við það að Stjarnan fái á sig fleiri villur og slíkt.“

Nokkrir lykilmenn Stjörnunnar komust nokkuð snemma í villuvandræði í leik númer tvö í einvíginu. Jakob er á því að ef dæmt væri venjulega allan leikinn yrði útlitið enn verra fyrir Stjörnuna. 

„Þá væru fjórir leikmenn hjá Stjörnunni farnir út af með fimm villur. Ég held að þeir viti það líka. Þeir vita hvernig þeir eru að spila vörnina. Þeir vita að þeir eru að brjóta af sér, vita að þeir munu fá dæmdar villur á sig en eru samt að reyna hafa áhrif þannig að þeir geti haldið sér inn á vellinum.“

Spili sig sem fórnarlömb

Finnst þér þetta lykta af því að þeir séu að reyna hafa áhrif á það hvernig lína er dregin í þessu einvígi?

„Ég veit ekki hvað þeir eru að hugsa. Ég veit bara að það er ekki hægt að bera þetta saman því þetta er tvennt ólíkt. Það að þeir séu að reyna gera sig að einhverjum fórnarlömbum í þessu er bara alls ekki rétt. Svolítið galið. Við ætlum bara að halda áfram að spila okkar leik. Reyna að láta þetta ekki hafa áhrif á okkur. Þegar allt kemur til alls held ég dómararnir muni hafa rétt fyrir sér. Mér finnst þeir hafa staðið sig vel í þessum fyrstu tveimur leikjum. Tel að það hafi ekki hallað meira á annað liðið heldur en hitt.“

KR stimplaði sig inn í einvígið með sigri á heimavelli á mánudaginn. Í fyrsta leik karlaliðs félagsins í úrslitakeppni efstu deildar í nokkur ár og var stemningin frábær.

„Það er mikið af fólki sem er búið að bíða í nokkur ár eftir því að fá þessa stemningu aftur í KR-heimilið. Ég var bara gríðarlega ánægður með að ná í sigur en líka með mætinguna, stemninguna í salnum heilt yfir. Það gerði mjög mikið fyrir félagið og fólkið í hverfinu. Að sjá að þetta er komið aftur í Vesturbæinn.“

Meira af því sama

Leikur þrjú í einvígi liðanna fer fram í Garðabænum í kvöld. Veislan heldur áfram og leikirnir til þessa engan svikið. Jakob á von á meira af því sama í kvöld.

„Ég á auðvitað bara von á gríðarlega erfiðum leik. Stjarnan er mjög gott lið, þeir eru sterkir á heimavelli og ríkjandi Íslandsmeistarar. Ég myndi halda að þetta yrði nokkuð svipað og fyrstu tveir leikirnir í þessu einvígi. Hraður leikur, líkamlega erfiður og lítið sem skilur liðin að. Í þessum fyrstu tveimur hafa hlutir eins og að skora stig á réttum tímapunktum í leiknum og fá stoppin á réttum tímapunktum til að fá mómentið með sér verið að skilja liðin að. Ég á ekki von á öðru en það verði nokkuð svipað í þessum leik.“

Leikur þrjú í einvígi Stjörnunnar og KR í úrslitakeppni Bónus deildar karla í körfubolta hefst klukkan hálf átta í kvöld og verður sýndur í beinni útsendingu á Sýn Sport Ísland.