„Það sér hver heil­vita maður að það er al­gjör tíma­skekkja“

Um er að ræða fyrsta dóminn sem fellur í máli er varðar lögmæti fyrirkomulagsins sem fjöldi netverslana hefur viðhaft við sölu á áfengi hér á landi á síðastliðnum árum. Arnar Sigurðsson, eigandi Santé, segir allan málatilbúnaðinn fráleitan og dóminn líka. Rætt var við Arnar í kvöldfréttum Sýnar í kvöld.

„Við einfaldlega búum við svokallaðan staðfestingarrétt EES-samningsins sem gerir það að verkum að öllum er frjálst að stunda viðskipti yfir landmæri,“ segir hann og að það sé rétt hægt að ímynda sér hvernig þetta virkar í Evrópu þar sem ekki megi hindra frjálst flæði fjármagns eða fólks yfir landmærin.

„Það að Ísland sé örlítið lengra frá skiptir náttúrulega ekki máli,“ segir hann.

Arnar segir málinu verða áfrýjað til æðra dómstigs og dómurinn hafi því engin áhrif til að byrja með. Hann segir reksturinn halda áfram eins og áður og í fyrramálið sé hann að taka við nýjum vörum.

„Það er ekkert sem hefur breyst.“

Hann segir auk þess að frá því að málið var höfðað og þar til í dag hafi komið álit frá Esa, eftirlitsstofnun EFTA, þar sem gerðar eru athugasemdir við núverandi fyrirkomulag áfengissölu hjá hinu opinbera.

„Sér í lagi það að annars er búið að einkavæða stærstu áfengisverslun landsins, sem er í fríhöfninni í Keflavík, og ESA eðlilega spyr: Hvað stendur eftir af þessu meinta einkaleyfi ÁTRV?“ segir Arnar og að ESA bendi réttilega á að Heinemenn, sem rekur verslunina, sé einkaaðili og ekki hið opinbera.

Þá hafi verið útdeilt áfengisverslanaleyfum til brugghúsa þar sem lítil brugghús mega selja á framleiðslustað sína framleiðslu og ESA spyrji því sömuleiðis hvað standi eftir af einkaleyfinu þegar svo sé.

„Svarið er auðvitað bara: Það er ekki neitt,“ segir Arnar.

Arnar segir stjórnvöld þurfa að girða sig í brók og klára þetta mál. Það sé frumvarp fyrir þingi um að leyfa netverslun með áfengi og það sé leitun að öðru eins fyrirkomulagi þar sem íslenskum almenningi er heimilt að versla áfengi af hvaða vínsala sem er, svo lengi sem vínsalinn eigi heima í útlöndum.

„Það sér hver heilvita maður að það er algjör tímaskekkja og byggist á einhverjum misskilningi um það að ÁTVR sé einhvers konar lýðsheilsuvörn en Íslendingar eiga heimsmet í fjölda áfengisverslana miðað við höfðatölu. Það er engin þjóð sem rekur jafn margar,“ segir Arnar og að hér á landi séu þrettán áfengisverslanir á hverja þúsund íbúa á meðan þær séu þrjár í Svíþjóð.