Haukarnir léku sér að Mosfellingum í fyrsta leik

Haukarnir unnu sannfærandi átta marka sigur í fyrsta leiknum á Ásvöllum í kvöld, 34-26, og geta tryggt sér sæti í undanúrslitum með sigri í næsta leik í Mosfellsbæ.

Freyr Aronsson skoraði níu mörk fyrir Hauka en þeir Jón Ómar Gíslason og Skarphéðinn Ívar Einarsson voru með fimm mörk hvor. Harri Halldórsson og Ihor Kopyshynskyi voru markahæstir hjá Aftureldingu með fimm mörk hvor.

Tveir fyrstu leikir átta liða úrslitanna voru framlengdir en það var aldrei spyrning um hvernig færi í þessum leik.

Haukarnir byrjuðu leikinn vel, voru komnir í 6-2 strax í upphafi og voru komnir sjö mörkum yfir, 14-7, eftir tuttugu mínútna leik. Þeir leiddu svo með átta mörkum í hálfleik, 20-12, og því löngu ljóst í hvað stefndi.

Freyr Aronsson var kominn með sex mörk og þrjár stoðsendingar í hálfleik og Skarphéðinn Ívar Einarsson var með fimm mörk í fyrri hálfleiknum.

Haukarnir gáfu ekkert eftir í seinni hálfleiknum og unnu afar öruggan sigur. Mosfellingar þurfa að laga margt í næsta leik ætli þeir ekki að fara í sumarfrí eftir þann leik.