Eva Sig­ný og Aníta til starfa hjá Borgar­leik­húsinu

Aníta hóf störf fyrr á leikárinu og hefur jafnframt yfirumsjón með rekstri veitingadeildar Borgarleikhússins. Hún starfaði áður hjá Hilton Reykjavík Nordica sem ráðstefnu- og viðburðastjóri. Áður starfaði Aníta hjá viðburðafyrirtækinu Practical auk annarra fjölbreyttra starfa innan íslenskrar ferðaþjónustu.

Í fréttatilkynningu frá Borgarleikhúsinu segir að markmið ráðningar viðburðastjóra sé meðal annars að leggja aukna áherslu á fjölbreytt ráðstefnu- og viðburðahald í leikhúsinu auk þess að efla þjónustustig við leikhúsgesti.

„Við viljum að fólk gefi sér góðan tíma í leikhúsinu; mæti snemma og njóti þess að fá sér veitingar í föstu og fljótandi formi auk þess sem það er kjörið að setjast á leikhúsbarinn að lokinni sýningu, gæða sér á drykk og njóta í góðra vina hópi,“ er haft eftir Anítu.

Sem yfirhönnuður Borgarleikhússins mun Eva Signý Berger hafa yfirumsjón með útliti leikhússins og verður tengiliður við leikmynda- og búningahöfunda í leiksýningum Leikfélags Reykjavíkur. Samhliða því mun hún einnig sjá um hönnun leikmynda í tveimur verkefnum á ári.

Eva hefur hannað yfir fimmtíu sýningar fyrir leikhús, dans, brúðuleikhús og óperu. Hún hefur hlotið fjölda tilnefninga til Grímunnar, íslensku sviðslistarverðlaunanna, fyrir störf sín. Eva hefur jafnframt komið að myndlistar- og kvikmyndaverkefnum og sat í stjórn FÍL árin 2018 til 2026. Þá hefur hún verið formaður Félags leikmynda- og búningahöfunda frá árinu 2021. 

„Við erum afar ánægð að fá Evu Signýju og Anítu til liðs við Borgarleikhúsið. Eva Signý hefur umsvifamikla þekkingu og reynslu sem hönnuður og hefur komið að mörgum sýningum í Borgarleikhúsinu. Hún þekkir því húsið og starfsemina hér vel. Aníta býr yfir víðtækri reynslu af ráðstefnu- og viðburðahaldi og hefur sýnt í störfum sínum mikinn metnað fyrir framúrskarandi þjónustu og fagmennsku. Með komu hennar sjáum við spennandi tækifæri til að efla enn frekar viðburðahald í húsinu og nýta þá einstöku aðstöðu sem Borgarleikhúsið hefur upp á að bjóða,“ er haft eftir Kristínu Ögmundsdóttur, framkvæmdastjóri Borgarleikhússins.