Besti dagur Wall Street frá því stríðið hófst

S&P 500 vísitalan hækkaði um eitt prósent í dag og stefndi í besta dag vísitölunnar í fimm vikur. Svipaða sögu var að segja af Dow Jones, sem hafði hækkað um 0,8 prósent og Nasdaq sem var upp um 1,3 prósent.

Þetta er að mestu rekið til lækkunar á olíuverði í dag. Brent-olíuvísitalan, sem er alþjóðlega viðmiðið, lækkaði um 0,9 prósent og stendur í 102,2 dölum á tunnu, eftir að hafa farið upp í 106,5, þegar mest var á undanförnum dögum. Samkvæmt AP fréttaveitunni lækkaði olíuvísitalan í Bandaríkjunum um 3,4 prósent og stendur í 95,36 dölum.

Fyrir rúmum tveimur vikum, áður en Bandaríkjamenn og Ísraelar hófu árásir á Íran, var olíuverð í um sjötíu dölum á tunnu.

Hér á Íslandi er ekki svipaða sögu að segja af mörkuðum og vestanhafs, þar sem nánast allar tölur Kauphallarinnar eru rauðar eftir daginn. Síldarvinnslan er eina félagið sem hækkaði í dag en það var um 0,95 prósent í tiltölulega umfangslitlum viðskiptum.

Markaðsvendingar þessar má að miklu leyti rekja til lokunar Hormússunds en um það sund fer rúmur fimmtungur af olíu heimsins. Donald Trump, forseti Bandaríkjanna, hefur talað fyrir því um helgina og í dag að mynda einskonar bandalag um opnun sundsins en ráðamenn í bandalagsríkjum Bandaríkjanna hafa flestir sýnt því takmarkaðan áhuga.

Sjá einnig: Bandamenn taka fálega í aðstoðarkröfur Trumps

CNBC hefur eftir Scott Bessent, fjármálaráðherra Bandaríkjanna, að Bandaríkjamenn hafi hleypt írönskum olíuflutningaskipum út úr Persaflóa. Það hafi verið gert með því markmiði að létta á þrýstingi á olíumörkuðum.

AP segir að hlutabréfamarkaður í Bandaríkjunum hafi í gegnum árin sýnt að hann jafni sig tiltölulega fljótt eftir átök í Mið-Austurlöndum, svo lengi sem olíuverð haldist ekki hátt til langs tíma. Fjárfestar búist við því að svipað verði upp á teningnum að þessu sinni.

Síðan átökin hófust hafa markaðir tekið miklar sveiflur í báðar áttir.