Ís­land tekur þátt í máli gegn Ísrael

Yfirlýsing um þátttöku Íslands í máli sem stjórnvöld í Suður-Afríku hófu gegn Ísrael var sent Alþjóðadómstólnum í gær, að því er kemur fram í tilkynningu frá utanríkisráðuneytinu.

Þátttaka Íslands er sögð hluti af stefnu sem Alþingi markaði í þingsályktun frá því í nóvember 2023 um afstöðu Íslands vegna átakanna. Þar var þess krafist að alþjóðalögum yrði fylgt og áréttað að öll brot á alþjóðalögum yrðu rannsökuð til hlítar.

Suður-Afríka krafðist þess að Ísrael yrði dæmt brotlegt við skyldur sínar samkvæmt hópmorðssáttmála Sameinuðu þjóðanna með framgöngu sinni í stríðinu gegn Hamas á Gasaströndinni.

„Það gildir einu hvar átök geisa í heiminum eða hver er að verki, alþjóðasamfélaginu ber skylda til að leiða brot á alþjóðalögum til lykta fyrir sjálfstæðum og óháðum dómstólum. Með þátttöku Íslands í máli Suður-Afríku fyrir Alþjóðadómstólnum beitum við rödd okkar í þágu alþjóðalaga og mannréttinda. Og af því megum við vera stolt,“ er haft eftir Þorgerði Katrínu Gunnarsdóttur utanríkisráðherra í tilkynningu ráðuneytis hennar.

Í hennar eigin Facebook-færslu segir Þorgerður Katrín að unnið hafi verið að greinargerð Íslands í málinu undanfarna mánuði. Hún hafi upplýst bæði ríkisstjórn og utanríkismálanefnd Alþingis um ákvörðun hennar um að Ísland taki þátt í málinu.

„Að skila inn greinargerð í máli sem þessu er stórt skref fyrir litla þjóð. En það er líka áminning um að jafnvel smáríki geta haft áhrif þegar þau velja að beita rödd sinni,“ skrifar utanríkisráðherra.

Fréttin hefur verið uppfærð.