Þriðjungur and­vígur at­kvæða­greiðslunni

Til stendur að greiða atkvæði um hvort Ísland eigi að halda áfram aðildarviðræðum við Evrópusambandið þann 29. ágúst. Samkvæmt upplýsingum frá Gallup eru 33 prósent þátttakenda alfarið hlynnt atkvæðagreiðslunni, tólf prósent mjög hlynnt, þrettán prósent frekar hlynnt, tólf prósent hvorki né, sjö prósent frekar andvíg, fimm prósent mjög andvíg og átján prósent alfarið andvíg. 

Þá eru karlar fremur andvígir atkvæðagreiðslunni en konur, en 39 prósent karla eru andvígir henni en 52 prósent hlynntir. Litið til kvenna eru 22 prósent andvígar og 62 prósent kvenna hlynntar.

Það kemur ef til vill lítið á óvart að kjósendur Viðreisnar séu hvað hlynntastir atkvæðagreiðslunni enda hefur slík atkvæðagreiðsla verið eitt þeirra helsta baráttumál. Kjósendur Miðflokksins og Sjálfstæðisflokksins eru andvígastir og rúmur helmingur kjósenda Framsóknarflokksins einnig.

Marktækur munur var á skoðun þeirra sem styðja ríkisstjórnina og þá sem eru andvígir henni. 83 prósent þeirra sem eru hlynntir ríkisstjórninni eru hlynntir atkvæðagreiðslunni.

Sjá nánar: Þjóðaratkvæðagreiðsla um framhald ESB-viðræðna

Þátttakendur í könnun Gallup, sem voru rúmlega átta hundruð, voru einnig spurðir hvernig þeir myndu líklegast greiða atkvæði ef þjóðaratkvæðagreiðslan væri haldin í dag. Ekki munaði miklu, 52 prósent sögðust kjósa með áframhaldandi aðildarviðræðum en 48 prósent myndu vilja hætta þeim.

Þau sem kysu Viðreisn og Samfylkingu ef kosið yrði til Alþingis í dag telja helst að þau myndu kjósa með framhaldi aðildar viðræðna fremur en þau sem myndu kjósa stjórnarandstöðuflokkana. Þau sem eru hlynnt þjóðaratkvæðagreiðslunni telja frekar að þau myndu kjósa með framhaldi aðildarviðræðna en nánast öll sem eru andvíg þjóðaratkvæðagreiðslunni myndu kjósa með því að hætta þeim. 

• Puls_0326_ESB_ThjodaratkvaediagreidslaPDF238KB
  Sækja skjal