Utan vallar: Himna­faðirinn, Jordan og kvöldið hans Elvars

07:12 Martinas Geben setur niður þrist. 56-77. Jæja, þar fór það. Hverjir eru hjá Gísla Marteini í kvöld? Hvað ætli séra Brown sé að brasa á eftir? Get ég bætt einhverju inn í umræðuna um stóra Smjörva/Bertolli-málið? Er hundurinn búinn að fara út að pissa?

05:45 Elvar setur niður þriggja stiga skot og svo vítaskot skömmu seinna. 62-77. Jæja, þetta verður allavega ekki algjört burst. 

04:18 Hilmar Smári Henningsson setur niður tvö vítaskot. Búinn að skora fimm stig í röð. 67-78. Ok, ég held áfram að horfa en þetta er ekki að fara að gerast, er það?

03:44 Elvar neglir niður þristi og Litáar taka leikhlé. 70-78. Heyrðu, andskotinn hafi það. Þetta er orðið spennandi.

02:00 Þórir Guðmundur Þorbjarnarson og Hilmar skora fjögur stig í röð af vítalínunni. 76-82. Tryggvi Snær Hlinason er kominn aftur inn á. Sama hvernig fer er baráttan allavega hetjuleg.

01:03 Tryggvi treður eftir sendingu frá Elvari, Litáar klikka og Elvar setur niður þrist. 81-83. Litáen tekur leikhlé. Er þetta að fara að gerast? Eru þeir að fara á taugum? Virkilega?

00:38 Elvar! Búmm! Annar þristur! 84-83. Ísland er komið yfir! Haltu kjafti, lagsmaður!

00:06 Tryggvi brýtur á Ignas Sargiunas. Hann setur niður víti. Og annað. 84-85. Andskotinn! Þetta er nú helvíti svekkjandi úr því sem er komið er. En Íslendingar taka leikhlé.

00:04 Elvar dripplar í fótinn á mótherja. Boltinn fer út af. Annað leikhlé. Áfram 84-85.

00:00 Elvar fær boltann, virðist hrasa en kemst framhjá varnarmanninum ... og sviss! Alsæla! Blái hluti Hallarinnar ærist af gleði. 86-85!!!

Já, við unnum bara Litáen. Það eitt og sér er afrek. En að vinna eftir að hafa verið 21 stigi undir þegar rúmar sjö mínútur voru eftir. Það er stöff fyrir sögubækurnar. Og svo var Gísli Marteinn bara veikur.

Litáen var vissulega ekki með alla sína aðalkalla. En þetta er samt einn af risunum í körfuboltanum. Níu medalíur á stórmótum frá sjálfstæði 1990. Litáen ól Arvydas Sabonis, Sarunas Marciulionis og Domantas Sabonis. Körfubolti eru trúarbrögð þar í landi. 

Og talandi um trúarbrögð. Fyrirliði Íslands, Ægir Þór Steinarsson, leitaði þangað í lýsingum sínum á Elvari eftir sigurinn frækna í Höllinni í gær.

Ég hef aldrei séð aðra eins frammistöðu eins og hjá Elvari hérna í fjórða leikhluta. Það var ótrúlegt. Þetta var eins og Guð sjálfur væri mættur á völlinn. Hann átti gólfið, átti þennan leik og kláraði þetta. Þvílíkur leikmaður.

Amen.

Ægir hjó í sama knérum og Larry Bird þegar hann lýsti Michael Jordan eftir að hann skoraði 63 stig gegn ofurliði Boston Celtics vorið 1986. 

„Þetta var Guð í dulargervi Michaels Jordan,“ sagði Bird eftir leikinn í Garðinum fyrir fjörutíu árum.

Elvar er ekki Guð, hann er ekki Michael Jordan en hann átti eina merkustu frammistöðu íslensks leikmanns í landsleik í gær. Og hann færði okkur líklega rosalegasta augnablik í sögu landsliðsins.

Elvar skoraði 34 stig, sautján á síðustu fimm mínútunum og 45 sekúndunum og síðustu átta stig Íslands. Hann skoraði tuttugu stigum meira en næststigahæsti leikmaður íslenska liðsins (Tryggvi). Njarðvíkingurinn hitti úr þrettán af 22 skotum sínum og sex af sjö þristum rötuðu rétta leið. Svo tók hann líka fjögur fráköst, gaf sex stoðsendingar og stal boltanum í þrígang. Bara af því þetta var þannig kvöld.

Elvar gerði þetta sannarlega ekki einn. Tryggvi hefur oft verið meira afgerandi en er samt alltaf svo ótrúlega mikilvægur. Innkoma Hilmars var frábær (níu stig, þrjú fráköst og fjórar stoðsendingar á tæpum sautján mínútum), Ólafur Ólafsson setti niður tvo þrista og lét finna fyrir sér, Þórir hitti kannski bara úr einu skoti en hafði mikil áhrif á gang mála og svo mætti áfram telja.

Það þurfti allar hendur á dekk. Martin Hermannsson var ekki með, Orri Gunnarsson meiddist illa á æfingu í aðdraganda leiksins og Haukur Helgi Pálsson datt út eftir hálfa mínútu.

En það er á engan hallað þegar sagt er að þetta hafi verið kvöldið hans Elvars. Og þetta er ekki í fyrsta skipti sem hann gerir þetta. Hann átti einnig stórleik í frábærum útisigri á Ítalíu, 76-81, í fyrsta leik undankeppninnar. Þar skoraði hann síðustu níu stig Íslands og endaði með 29 stig og fimm stoðsendingar.

Elvar er þriðji stigahæsti leikmaður undankeppni HM 2027 (24,0 stig að meðaltali í leik), tíundi stoðsendingahæsti (6,3) og sjötti framlagshæsti (23,7). Hann er með fimmtíu prósent skotnýtingu, 52,6 prósent nýtingu í þriggja stiga skotum og 90,9 prósent vítanýtingu.

Elvar var hársbreidd frá því að skjóta Íslandi á síðasta heimsmeistaramót. En núna ætlar hann að koma Íslendingum þangað, með öllum tiltækum ráðum.

Þessi hógværi Njarðvíkingur hefur átt afar farsælan feril þótt kastljósið hafi ekki alltaf beinst að honum. Hann hefur verið stoðsendingakóngur í þremur deildum (Svíþjóð, Litáen og Hollandi/Belgíu) og í Evrópubikarnum, á stoðsendingametið í einum leik í grísku deildinni, varð sænskur meistari og valinn bestur í litháísku deildinni.

Og það virðist ekkert hægjast á honum þrátt fyrir að hafa verið á sífelldri hraðferð í fullorðinsbolta frá því hann var sautján ára. Vonandi eru frekari landvinningar handan hornsins en sama hvað gerist verður föstudagskvöldið 27. febrúar alltaf kvöldið hans Elvars. Þar gekk hann á vatni.