„Við sáum það að þetta hreyfði við for­sætis­ráð­herra“

Fjallað var um mál mannanna í Kveik í fyrradag en tíu manns hafa stigið fram og lýst grófu ofbeldi sem þeir urðu fyrir á sveitabænum Bakkakoti á Rangárvöllum þangað sem fjöldi barna var sendur í vistun á að minnsta kosti 27 ára tímabili frá 1975 til 2002. Þrír fulltrúar tímenninganna mættu í dag í stjórnarráðið til fundar við Kristrúnu Frostadóttur forsætisráðherra. Kristrún veitti ekki kost á viðtali vegna málsins í dag.

Hvetja aðra til að stíga fram

„Ég veit eiginlega ekki hvað ég á að segja annað en bara takk til þjóðarinnar að standa við bakið á þeim sem voru á þessum stað. Við höldum að sjálfsögðu ótrauðir áfram að vinna í þessu máli og hvetjum aðra til að stíga fram líka sem hafa svipaða sögu,“ segir Svavar Þór Georgsson einn þremenninganna.

Þeir vilji fyrst og fremst knýja fram breytingar sem tryggi öryggi barna sem komið sé fyrir á fósturheimilum. „Við sáum það að þetta hreyfði við forsætisráðherra og ég hef trú á því að það verði gert eitthvað í þessu og einhverjar breytingar varðandi eftirlit með börnum,“ segir Sigvarður Hans Ísleifsson annar þremenninganna.

„Svo kom fram að það er betra eftirlit með fóðri dýra heldur en börnum á vistheimilum í landinu. Þannig ég vona innilega að þetta leiði til jákvæðra breytinga.“

Tók á að ræða ofbeldið

Það hafi tekið á að stíga fram með þessum hætti og ræða ofbeldið frammi fyrir alþjóð.

„Við erum búnir að vera bæði stressaðir og hræddir og líka áðurinn en þátturinn kom út: Verður okkur trúað, hvað á eftir að gerast? Eigum við eftir að fá hótanir eða verður reynt að þagga niður í okkur?“

Þeir hafi hinsvegar fundið fyrir miklum stuðningi. Lögmaður þeirra segist eiga von á að þeir muni funda oftar með forsætisráðherra, en vildi að öðru leyti ekki tjá sig efnislega um kröfur mannanna. 

„Við vildum leyfa strákunum að tjá sig líka, segja frá því sem ekki kom fram í þættinum. Það er gríðarlegt magn upplýsinga sem ekki kom fram í þessum þætti, þetta var bara klukkutíma langur þáttur, þannig eins og ég segi, þetta er bara rétt að byrja.“