Opna landa­mærin og fjöldi fluttur frá Gasa

Landamærin hafa verið ein þau fjölförnustu meðal hjálparstarfsmanna meðan á stríðinu hefur staðið. Áður en Ísraelar lýstu yfir stríði á hendur Hamas í október 2023 voru landamærin eina útgönguleið íbúa frá Gasa. Síðan í maí 2024, hafa þau að mestu leyti verið lokuð, að því er kemur fram í frétt Reuters.

Samkvæmt upplýsingum frá COGAT-deild Ísraelshers, sem sér um samhæfingu mannúðarstarfs á svæðinu, opna landamærin á morgun. Einungis gangandi vegfarendum verður hleypt um landamærin og öryggiseftirlit við þau verður samkvæmt ísraelskum stjórnvöldum strangt. 

Búist er við umferð bæði út af svæðinu og inn á það, en talsvert meiri umferð út. Sem fyrr segir er Palestínumönnum einum heimiluð umferð um landamærin. Samkvæmt upplýsingum frá heilbrigðisyfirvöldum á Gasa bíða 20 þúsund inniliggjandi sjúklingar þess að yfirgefa Gasaströndina.

Þrjátíu drepnir í gær

Opnun landamæranna við Rafah er stór liður í fyrsta fasa áætlunar Donalds Trump Bandaríkjaforseta um að koma á varanlegum friði á Gasa. Vopnahlé tók gildi í október en bæði Ísraelar og Hamas-liðar hafa sakað andstæðinginn um vopnahlésbrot. 

Samkvæmt heilbrigðisyfirvöldum á Gasa hafa Ísraelar drepið yfir fimm hundruð manns síðan vopnahléið átti að taka gildi. Í gær drápu Ísraelar að minnsta kosti þrjátíu manns í loftárásum sem voru þær umfangsmestu síðan vopnahléið tók gildi. 

Ísraelsher sagði árásirnar hefndaraðgerðir vegna vopnahlésbrota vígamanna Hamas, sem herinn sagði að hefðu komið sér fyrir í neðanjarðargöngum í Rafah.

Í næsta fasa friðaráætlunar Trumps felst meðal annars að stjórn yfir Gasaströndinni verði falin tækniveldissinnum, Hamas afvopnist og Ísraelsher dragi úr hernaði á svæðinu.

Hamas hefur margsinnis neitað að afvopnast og Ísraelsher í leið ýjað að því að ef samtökin afvopnist ekki á friðsamlegan hátt verði þau afvopnuð með hervaldi.