„Búið að rífa úr honum stælana, egóið og hrokann“

„Mér líður mjög vel. Það er góð tilfinning að koma akkúrat hingað inn, þetta er sama fjölmiðlasvæði og við vorum á fyrir þremur árum síðan. Við vitum alveg hvað bíður okkar hérna; það er mikil stemning og hörkuleikir. Við erum peppaðir og gaman að koma á næsta EM, loksins,“ segir Björgvin Páll en loftbrú verður frá Íslandi til Kristianstad í dag.

Tvö til þrjú þúsund Íslendingar munu taka yfir þennan 40 þúsund manna bæ, líkt og þeir gerðu á HM 2023. Mikil spenna er í bænum fyrir komu Íslendinganna og má búast við einstakri stemningu.

Það ýtir undir spennu á meðal leikmanna og hefur líklega áhrif á það að Björgvin fái seint nóg af því að mæta með liðinu á stórmót.

Þú færð ekkert nóg af þessu?

„Nei, heldur betur ekki,“ segir Björgvin og brosir. „Ég held að þú sjáir það bara inni á vellinum að ég hef gaman að þessu, hef ástríðu fyrir þessu, og meðan hún lifir enn þá held ég áfram,“ segir Björgvin.

Eitthvað mikið að ef hann hefur ekki þroskast

Björgvin Páll fór á sitt fyrsta stórmót þegar hann var valinn í landsliðshópinn fyrir Ólympíuleikana í Peking sumarið 2008. Hann hefur mætt á hvert einasta stórmót síðan og því það nítjánda sem hefst á morgun.

En hver er mesti munurinn á Björgvini Páli árið 2008 og þeim sem mætir á mótið í dag?

„Ætli það sé ekki búið að rífa úr honum alla töffarastælana og egóið og hrokann? Það er svona helst. Fyrsti landsleikurinn var 2003 þannig að þetta er tuttugasta og fjórða árið að byrja. Ef maður er ekki búinn að þroskast eitthvað á þeim tíma er eitthvað mikið að,“ segir Björgvin og hlær.

Fimur á fimmtugsaldri

Björgvin verður 41 árs í maí næskomandi og hefur sætt gagnrýni á undanförnum mótum. Einhverjir hafa kallað eftir yngri manni inn í hópinn í hans stað. Björgvin sýndi hins vegar í æfingaleik við Evrópumeistara Frakka um liðna helgi að hann er enn í hörkustandi.

„Mér líður vel. Með fullri virðingu fyrir deildinni heima er gott að sjá að ég get skipt um gír frá þeirri deild að spila á móti þeim bestu í heimi nokkrum dögum seinna. Í janúar er það auðveldara, þegar þú ert með landsliðinu í tvær vikur fram að móti, að fá á þig fullt af skotum og æfa með bestu gaurum í heimi. Það er slatti af þeim í okkar liði. Það heldur mér á tánum og heldur mér ungum. Svo er ég ungur í anda svo það á að vera auðvelt verkefni,“ segir Björgvin Páll.

Fleira kemur fram í viðtaæli við markvörðinn knáa sem má sjá í heild að neðan.