Elds­neytis­verð lækkaði hressi­lega á mið­nætti

Á stöð Orkunnar við Laugaveg í Reykjavík var verð á bensíni 308,5 krónur á næstsíðasta degi nýliðins árs en lítraverðið var komið í 212 krónur í morgun. Lækkunin nemur um 31 prósentum. Að sama skapi fór verð á dísillítranum úr 314,2 krónum í 226,9 krónur sem er um 28 prósenta lækkun.

Líkt og fram hefur komið samþykkti Alþingi á dögunum ný lög um kílómetragjald á ökutæki. Samhliða lögunum hafa eldsneytisgjöld og vörugjöld á bensíni verið felld niður ásamt olíugjaldi, en kolefnisgjald að sama skapi hækkað.

Viðbragða olíufélaganna við breytingum á bifreiðagjöldum um áramótin hefur verið beðið með nokkurri eftirvæntingu og lýsti Samkeppniseftirlitið þeim á dögunum sem prófsteini á samkeppni á eldsneytismarkaðnum. Stofnunin sagði það algera lágmarkskröfu að lækkun eldsneytis myndi samsvara að fullu lækkun hinna opinberu gjalda og hvatti jafnframt viðskiptavini til að vera á varðbergi.

Lítrinn kominn undir 200 krónur

Á þeim eldneytisstöðvum Orkunnar, Atlantsolíu og ÓB þar sem boðið er upp á lægsta verðið, ef frá er talið Costco þar sem verð er jafnan lægst, kostar bensínlítrinn nú rétt rúmar 183 krónur og dísillítrinn rúmar 205 krónur.

Hinu nýja kílómetragjaldi er ætlað að standa undir uppbyggingu vega þar sem eldra kerfi gæti ekki tryggt fjármögnun vegakerfisins til framtíðar. Gjaldskyld ökutæki eru bílar, bifhjól, dráttarvélar og eftirvagnar en undanskilin eru þó til dæmis ökutæki björgunarsveita.

Eigendur munu þurfa að skrá kílómetrastöðu ökutækisins að minnsta kosti einu sinni á ári og er það gert í gegnum Ísland.is, en einnig verður hægt að gera það á skoðunarstöð. Gjaldið verður greitt mánaðarlega og verður fyrsti gjalddagi 1. febrúar á nýju ári.

Gjaldið fer eftir þyngd ökutækisins en öll ökutæki undir 3500 kílóum, sem er viðmiðið fyrir hefðbundin ökuréttindi, borga sama gjald eða 6,95 krónur á hvern ekinn kílómeter.