Vatnshæðin að­eins lækkað í Skaft­á

„Staðan er ósköp svipuð, það hefur aðeins lækkað vatnshæðin, en það er ekki mikið. Hlaupið heldur bara áfram,“ segir Sigríður Magnea Óskarsdóttir, náttúruvársérfræðingur á Veðurstofu Íslands, og að of snemmt sé að segja til um það hvort hlaupið sé í rénun.

Hún segir vatnshæðina um 180 sentímetra eins og er sem sé í minni kantinum. „Eins og gott sumarrennsli.“

Hún segir reynsluna sýna að þetta geti tekið nokkra daga og þau verði að sjá í dag og á morgun hvort að hámarksrennsli hafi verið náð. Eins og staðan er núna óttist sérfræðingar Veðurstofunnar ekki að vatnshæð verði það mikil að hún valdi miklu tjóni.

Fram kom í tilkynningu í gær að hlaupið hefði hafist aðfaranótt sunnudags og að það hafi verið hægvaxandi fram til miðnættis í gær. Þar kom einnig fram að rennslið væri örlítið meira en mesta sumarrennsli, eða um 250 rúmmetrar á sekúndu. Leiðni hefur jafnframt farið vaxandi og hafa tilkynningar borist um brennisteinslykt af ánni.

Björgvin Karl Harðarson bóndi á Hunkubökkum í Skaftárhreppi tók eftir miklum breytingum á ánni milli daga og lýsti miklum breytingum á ánni í samtali við Vísi í gær.