Átta­tíu hafa sótt um nýju leiðina, Stefnir fagnar á­kvörðun Seðla­bankans

Fjármálastöðugleikanefnd Seðlabankans tilkynnti í gær um hert lánþegaskilyrði hjá fjármálastofnunum vegna glænýrra sameignarsamninga byggingafyrirtækja á fasteignamarkaði. Nú þarf við útreikning fjármálastofnana á greiðslubyrði lána að taka tillit allra greiðslna sem falla til vegna fasteignakaupa, líka þeirra sem er frestað samkvæmt nýjum sameignarsamningum. 

Sex byggingafyrirtæki með sex sjóði hjá Stefni

Sjóðstýringarfyrirtækið Stefnir og dótturfélag Arion banka er eina félagið, eins og er, sem býður byggingafyrirtækjum upp á að reka fyrir þau sjóði sem gera sameignarsamninga við kaupendur fasteigna. 

Fyrirtækin sem bjóða upp á sameignarformið

Nú þegar eru sex byggingafyrirtæki sem bjóða upp á sameignarleið að íbúðakaupum hjá Stefni. 

Reir verk hf. (Reir 20)

Byggingafélagið Skuggi (Kauplykill)

ÞG verktakar (ÞG 20)

SAFÍR byggingar ehf. (SAFÍR 20)

Öxar byggingafélag ehf. (Öxar 20)

Umbra ehf. (Umbra 20)

Áttatíu hafa sótt um sameignarsamninga

 Jón Finnbogason framkvæmdastjóri Stefnis segir að um áttatíu manns hafi sótt um sameignarsamninga hjá Stefni við íbúðarkaup. 

„Við erum að reka sjóði sem eru fjármagnaðir af byggingaraðilum. Þessir sjóðir  kaupa íbúðirnar með einstaklingum sem kjósa að nýta þessa leið og þannig verða sjóðirnir meðeigendur íbúðanna. Við rekum þessa sjóði eins og aðra sjóði hjá Stefni,“ segir Jón.   

Seðlabankastjóri hefur lagt á við kaupendur sem fara þessa leið að lesa vel yfir öll skilyrðin sem fylgja. Samningar geti verið langir og flóknir. Fréttastofa fékk afrit af sameignarsamningi upp á þrjátíu blaðsíður. Þá fylgir einnig sérstakur leigusamningur upp á fimm blaðsíður og viðauki sem telur nokkrar síður. Loks fylgja tvö skjöl sem eru samantektir á fyrrgreindum samningum. Fram kemur að þrír aðilar eru hluti af samningnum auk kaupanda eða Stefnir, sjálft byggingafyrirtækið og nýtt fyrirtæki sem ber heitið Aparta á Íslandi en hét áður Hili og var kynnt sem nýsköpunarfyrirtæki á þessu ári.  

Jón Finnbogason segir að hluthafar sjóðanna greiði umsýslugjald til Stefnis fyrir reksturinn en ekki kaupendur fasteignanna. Hluthafarnir fái svo lægri ávöxtun af sjóðnum sem nemi kostnaðinum af því að reka hann.

„Samstarfsaðili Stefnis í þessum samningum er fyrirtækið Aparta á Íslandi. Það er fyrirtæki er hluti af stærra félagi sem er að veita sömu þjónustu í Skandinavíu. Það sér um samskipti við kaupanda ef einhver mál koma upp eins og ef hann vill breyta eða bæta íbúðarhúsnæðið,“ segir Jón. 

Aðspurður um hvað Aparta á Íslandi taki fyrir sína þjónustu svara Jón:

„Það er innifalið í þóknun sem Stefnir tekur. Við erum ekki að rukka kaupendur um það.“

 Fagnar útspili Seðlabankans

 Jón segir að Stefnir hafi látið Seðlabankanum í té öll þau gögn sem fylgja nýju sameignarsamningunum. Hann fagni því að bankinn hafi ákveðið að þrengja lánþegaskilyrði vegna nýja formsins. 

„Við höfum veitt Seðlabankanum aðgang að öllum gögnum og samningum frá upphafi vegna þessarar leiðar og fundað ítrekað með bankanum. Við fögnum því að Seðlabankinn taki málið áfram til þeirrar skoðunar sem þeir hafa gert af miklum myndugleika frá upphafi. Við fögnum að þeir segi gott og vel þessi vara er svona og við teljum rétt að breyta reglum um greiðslumat með þessum hætti,“ segir hann.

Aðspurður um hvort Stefnir sé í samvinnu við Arion banka vegna nýja formsins í ljósi þess að Stefnir er dótturfélag bankans svarar Jón:

„Við vinnum með öllum lánveitendum. Þessi leið hefur ekki skoðun á því hverjir eru að lána, heldur hvar meðeigandinn fær bestu kjörin.“