„Hún er sá leik­maður sem við hefðum viljað fá í þessi færi“

„Auðvitað var maður ótrúlega svekktur, en á sama tíma ótrúlega stoltur af liðinu, þannig að þetta voru mjög blendnar tilfinningar“ sagði Sandra þegar hún var spurð út í leikinn gegn Serbíu í gær.

Sem fyrirliði er hún í ábyrgðarmiklu hlutverki á svona stundum og Sandra ætlar að nýta daginn í dag til að þjappa hópnum saman.

„Fyrst hélt ég að allir væru ótrúlega stoltir, sem ég held að allir séu, en svo þegar maður fór upp í stúku sá maður margar detta í faðmlög við mömmu sína og pabba og fara að gráta. Þá hugsaði maður líka að dagurinn í dag væri ótrúlega mikilvægur, til að þjappa okkur saman aftur.“

Þórey Anna Ásgeirsdóttir var gráti næst í gærkvöldi eftir að hafa klikkað á tveimur færum sem hefðu getað jafnað leikinn, en Sandra segir enga betri í þessum færum en Þóreyju.

„Við erum alveg búin að spjalla saman og það sem ég sagði við hana er bara að hún er sá leikmaður sem við hefðum viljað fá í þessi færi, ef við hefðum fengið að velja einhvern leikmann, þannig að ég vona að hún sé búin að átta sig á því og við erum allar búnar að peppa hana mjög mikið.“

Úrúgvæ er næsti andstæðingur en þær suðamerísku hafa tapað fyrstu tveimur leikjunum stórt og ættu ekki að reynast þessu eldspræka íslenska liði mikil fyrirstaða.

„Jú, þær kunna alveg handbolta sko, en ef við bara spilum eins og við erum búnar spila þá eigum við að geta unnið þær. En við þurfum þá að sýna okkar besta og gera þetta vel“ sagði fyrirliðinn Sandra sem nýtur góðs stuðnings fjölskyldu sinnar um helgina, eins og hún sagði í viðtalinu sem má sjá hér fyrir neðan.