Sýn gefur út afkomuviðvörun

„Á haustmánuðum fór fram yfirfærsla viðskiptavina félagsins í nýtt og einfaldara vöruframboð. Yfirfærslan gekk almennt vel en félagið ákvað að gjaldfæra einskiptis 90 m.kr. kostnað til að einfalda reikningagerð í þágu viðskiptavina,“ segir í fréttatilkynningu frá Sýn.

Í sumar sameinuðust vörumerki fyrirtækisins undir nafni Sýnar.

Í nýrri afkomuspá er gert ráð fyrir 280 milljóna króna rekstrarhagnaði á árinu, þar af sjö milljónum króna á þriðja ársfjórðungi og um 350 milljónir króna á þeim fjórða. Gert var ráð fyrir að rekstrarhagnaðurinn yrði á bilinu átta hundruð til þúsund milljóna króna. 

Einnig var gert ráð fyrir að EBITDAaL yrði um fjögur þúsund til 4.200 milljónir króna en ný afkomuspá gerir ráð fyrir að það verði um 3.450 milljónir króna.

Lækka rekstrarkostnað og ráðast í skipulagsbreytingar

Áfram verði horft til lækkunar á rekstrarkostnaði fyrirtækisins sem á að skila sér að fullu í byrjun næsta árs samkvæmt tilkynningunni auk þess sem lokið verður við að framselja farnetsdreifikerfi Sýnar til Sendafélagsins.

„Í ljósi markaðsaðstæðna og skorts á raunhæfum aðgerðum stjórnvalda til að jafna samkeppnisstöðu einkarekinna miðla, annars vegar gagnvart RÚV og hins vegar erlendum efnisveitum og samskiptamiðlum, er félagið að vinna að endurskoðun á tekjumódeli í tengslum við fjölmiðlarekstur félagsins,“ segir í tilkynningunni.

Þá hefur nú þegar verið ráðist í skipulagsbreytingar og verður Sölu- og þjónustusvið Sýnar sameinað inn á tvö svið. Sölusvið mun sameinast Upplifun viðskiptavina undir heitinu Sölu- og markaðssvið undir stjórn Guðmundar Halldórs Björnssonar. Þjónustusvið rennur saman við mannauðssvið og mun það heita Þjónustu- og mannauðssvið. Valdís Arnórsdóttir verður framkvæmdastjóri sviðsins.

Vegna þessara breytinga hefur verið gert samkomulag við Gunnar Guðjónsson um að láta af störfum sem framkvæmdastjóri Sölu- og þjónustusviðs og fækkar því um einn í framkvæmdastjórn félagsins.

Vísir er í eigu Sýnar.