Ráðin fyrsti fram­kvæmda­stjóri Kennara­sam­bandsins

Í tilkynningu á vef sambandsins segir að hún taki formlega við stöðu framkvæmdastjóra Kennarasambandsins þann 1. október næstkomandi og að hún hafi víðtæka reynslu á sviði stjórnunar, reksturs, stefnumótunar og mannauðsmála.

„Dagný kemur til Kennarasambandsins frá Reykjavíkurborg þar sem hún hefur starfað frá árinu 2010. Þar hefur hún gegnt starfi deildarstjóra þjónustu og stjórnsýslu á skrifstofu borgarstjóra og borgarritara frá árinu 2014. Dagný hefur sem stjórnandi hjá Reykjavíkurborg mikla reynslu hvað varðar daglegan rekstur, stýringu mannauðs og fjármálastjórn.

Í störfum sínum hefur Dagný jafnframt leitt faglegt starf sem viðkemur þjónustu og stjórnsýslu, borið ábyrgð á þjónustu við borgarstjóra í víðu samhengi og auk þess sinnt stefnumótun, áætlanagerð, þróun verkferla og gæðamálum.

Dagný er stjórnmálafræðingur að mennt, með meistaragráðu í blaða- og fréttamennsku og hefur auk þess starfað sem blaðamaður og ritstjóri,“ segir í tilkynningunni. 

Um er að ræða nýja stöðu innan sambandsins. Haft er eftir Magnúsi Þór Jónssyni, formanni KÍ, að ákvörðun um að gera þessa breytingu á skipulagi sambandsins hafi verið tekin á vettvangi stjórnar á vordögum.

„Segja má að ákveðinn grunn að stöðu framkvæmdastjóra megi finna í starfi skrifstofustjóra sem mun verða lagt niður í áföngum núna í vetur en ekki síður er starfinu ætlað að styrkja innra starf skrifstofu Kennarasambandsins og efla ramma um starfsemi aðildarfélaganna okkar, sjóðanna, nefndanna og ráðanna,“ er haft eftir Magnúsi Þór.

Alls bárust 28 umsóknir um starf framkvæmdastjóra og var það samhljóma mat stjórnar KÍ og Attentus, sem hélt utan um ferlið, að Dagný Ingadóttir væri hæfasti einstaklingurinn til starfans. 

Dagný mun í fyrstu starfa við hlið Hannesar Þorsteinssonar skrifstofustjóra en hann mun láta af störfum að loknu 9. þingi KÍ sem fer fram í apríl á næsta ári.