Vilja taka yfir Play

Í tilkynningu Play til Kauphallar segir að Play hafi borist tilkynning frá félaginu BBL 212 hf. um fyrirhugað valfrjálst yfirtökutilboð BBL 212 hf. í allt hlutafé Fly Play hf.

Forvígismenn félagsins BBL 212 hf. séu Einar Örn Ólafsson, fjárfestir og forstjóri Fly Play hf, og Elías Skúli Skúlason, fjárfestir og varaformaður stjórnar Fly Play hf.

Afskrá og hækka hlutafé

„Tveir af stærstu hluthöfum flugfélagsins Play stefna á að gera yfirtökutilboð í alla hluti flugfélagsins og afskrá félagið af hlutabréfamarkaði. Samhliða færi fram hlutafjáraukning. Yfirtökuhópurinn, sem leiddur er af Einari Erni Ólafssyni forstjóra og Elíasi Skúla Skúlasyni varaformanni stjórnar, ætlar sér áfram að stuðla að samkeppni á íslenskum flugmarkaði neytendum til góða undir merkjum Play með því að bjóða hagkvæm flugfargjöld fyrir Íslendinga og ferðamenn,“ segir í fréttatilkynningu frá Play.

Yfirtökuhópurinn muni leggja áherslu á eftirfarandi þætti í rekstri félagsins:

• Gott framboð til sólarlandastaða frá Íslandi.
• Flugi til Norður-Ameríku verði hætt frá og með október 2025.
• Borgaráfangastöðum í Norður-Evrópu mun fækka.
• Flogið verður undir maltnesku flugrekstrarleyfi og íslenska flugrekstrarleyfinu verður skilað.
• Fjórar flugvélar munu sinna flugi til og frá Íslandi, einkum til sólarlanda.
• Hinar sex vélarnar verða leigðar í arðbær verkefni til annarra flugrekenda.
• Félagið verður afskráð af hlutabréfamarkaði.
• Aukin áhersla á skrifstofur félagsins í Möltu og Litháen.

Í stuttu máli muni farþegar frá Íslandi ekki finna fyrir breytingum á þjónustu félagsins. Yfirbragð og ásýnd félagsins og flugvéla verði óbreytt. Farþegaþoturnar verði enn þá rauðar, áhafnir verði frá Íslandi og starfi eftir íslenskum kjarasamningum.

Bjóða eina krónu á hlut

Yfirtökuhópurinn muni gera tilboð sem hljóðar upp á eina krónu fyrir hvern hlut og seljendur geti annað hvort fengið greitt í formi hlutar í nýju félagi eða reiðufjár. Gengi Play stóð í 0,81 krónu á hlut þegar mörkuðum var lokað síðdegis.

„Með þessum áherslum hyggst yfirtökuhópurinn halda áfram þeirri vegferð að auka vægi arðbærs hluta rekstur félagsins, sólarlandaferða og leiguverkefna, og hætta þeim hluta starfseminnar sem skilað hefur lakari árangri, sem er flug til Bandaríkjanna og tengiflug.“

Yfirtökufélagið verði fjármagnað með að lágmarki tuttugu milljóna dollara fjárframlagi en af þeirri fjárhæð sé þegar skuldbinding fyrir rúmlega þriðjungi fjárhæðarinnar.

Praktískar breytingar

„Hér er fyrst og fremst um að ræða áform um praktískar breytingar á starfsemi íslenska flugfélagsins Play. Með þeim leggjum við áherslu á arðbæra þætti rekstursins, það er sólarlandaflug, og hættum þeim hluta rekstursins sem hefur ekki skilað árangri. Við hlökkum til að halda áfram að stuðla að samkeppni á flugmarkaði í rauðu vélunum, með íslenskum áhöfnum. Meginmarkmið okkar er nú sem fyrr að bjóða Íslendingum hagkvæm flugfarfargjöld í sólina,“ er haft eftir Einari Erni.

Einar Örn var gestur í Reykjavík síðdegis á Bylgjunni og ræddi breytingarnar.

Fréttin hefur verið uppfærð.