Dóms­dagur nálgast!

Ef satt reynist að HBO Max sé að nema hér land í Júlí n.k. markar það ákveðin straumhvörf í streymisheiminum hér á landi, þar sem helstu eigendur og framleiðendur efnisréttar í heiminum hafa þá séð sér fært að nema hér land á þessum örmarkaði sem Ísland er.

Ég hef unnið aðeins fyrir WB sem á og rekur þessa streymisveitu og lagt þeim til ráð um hvað beri að gera hér, ef svo færi að tekin yrði ákvörðun um að koma og hvað ekki. Þetta var reyndar fyrir um 2 árum, sem segir manni hvaða tíma það tekur fyrir þessi risa efnisréttarfyrirtæki að ákvarða hvort þeir eigi að fara eða sleppa ákveðnum markaðssvæðum. Kosturinn við HBO Max er reyndar sá að þeir eiga töluvert af íslenskum þýðingum sem auðvitað koma þeim til góðs hér, en hvar setur þetta svo strik í reikning innlendra aðila sem enn rembast við að halda uppi e.k. viðnámi gagnvart erlendum streymisáhrifum? Jú, þau verða öll á sömu bókina lögð, kannski ekki í dag eða morgun, en þau munu öll sem eitt hverfa og ég reikna með að um næstu eða allavega þar næstu jól munu fjarskiptafyrirtækin hreinlega böndla erlendu streymisveiturnar í e.k. „síma,sjónvarps,skemmti&netpakka“ fyrir heimilin í landinu fyrir 2990 kall og hreinlega hætta að fjárfesta í erlendum innkaupum á afþreyingarefni þar sem slíkt hreinlega borgar sig ekki lengur.

Margir eiga 4K sjónvörp og þessar streymisveitur bjóða 4K upplausn sem er auðvitað mun skýrari en þessi hefðbundna fhd lína sem allir bjóða nú og þar eru streymisveiturnar að gera miklu miklu betur en innlendir aðilar sem hafa bara „fiktað“ aðeins við 4K sem tilraunamennsku fram að þessu en eðli málsins kannski ekki uppfært innviði, en gott og vel, eitt núll fyrir þeim.

Ég er búinn að rita margt og mikið um sjónvarp og ég er ekki að sjá að neitt sem ég hef krotað á blað ekki raungerast og þá situr þessi einfalda spurning alltaf eftir? Hvenær ætla ráðamenn þjóðarinnar að fatta það að það þarf að gefa í með talsetningar og textun á íslensku, ekki bara tala sí og æ um fjölmiðlastyrki því það er ekki sanngjarnt að segja sífellt við almenning um að það sé verið að veita fjölmiðlum styrki, hið rétta er að verið er að veita fréttamiðlum styrki til að halda úti innlendum fréttum en ekki afþreyingu. Á þessu er stór munur.

Ég held svei mér þá að eftir ekki svo mörg ár verði ekkert innlent sjónvarpsfyrirtæki starfandi hér lengur, heldur verði staðan einfaldlega sú að stóru erlendu streymisfyrirtækin verða búin að þjappa sér saman í sífelldri endurnýjun á að skapa verðmæti og lækka kostnað og búin að kaupa upp þá afþreyingarmiðla og vörumerki sem enn voru uppi og þá verði kannski bara niðri í bæ í einni kytru e.k. skrifstofa sem annast samskipti við Ríkið um hin ýmsu „leyfi“ til að geta rekið hér afþreyingarmiðla með sína servera á meginlandi Evrópu því miður, því þetta er að raungerast í löndunum í kringum okkur.

Það gæti alveg farið svo einn góðan veðurdag að Skjár 1 verði ekki lengur annað en undirrás hjá Pluto TV eða Plex, en allavega, það er enn hægt að snúa þessu við, en það verður þá einhver að vakna þarna niðri á Austurvelli og fara að kalla þetta það sem það raunverulega er, útrýming á íslensku sjónvarpi því þó enn sé verið að gefa RÚV 5 milljarða árlega þá dettur inn fólk á þing sem hættir slíkri vitleysu og áttar sig á því að RÚV er ekki sjónvarp allra landsmanna því fjölmargir hafa sagt upp áskriftinni að Efstaleiti fyrir margt löngu síðan, enda get ég sagt frá einu dæmi, Skjár 1 árið 1999 var með kvikmynda samning við Paramount á borðinu, en viti menn RÚV komst á snoðir um hann yfirbauð fyrir peninga skattborgaranna. Þetta var á síðustu öld og RÚV er enn að yfirbjóða einkarekna miðla, er þetta ekki bara komið gott?

Höfundur er áhugamaður um sjónvarp.