Hrika­legur á­rekstur Tsunoda, nýtt á­fall fyrir Ferrari og Piastri fremstur

Piastri endaði 0,034 sekúndu á undan Verstappen þrátt fyrir að lenda í umferð í síðustu tveimur beygjunum og ná ekki að bæta tíma sinn í lokahlutanum.

Vandræði Ferrari héldu hins vegar áfram og hvorki Charles Leclerce né Lewis Hamilton tókst að komast í hóp tíu efstu. Leclerc ræsir ellefti og Hamilton tólfti.

Árangur Aston Martin vakti hins vegar athygli en Fernando Alonso náði besta árangri liðsins á tímabilinu með því að ná í 5. sætið og Lance Stroll ræsir áttundi.

Rauða flaggið fór tvisvar á loft í tímatökunum. Fyrst eftir skelfilegan árekstur hjá Yuki Tsunoda sem gekk þó sem betur fer óstuddur úr bílnum, eins og sjá má hér að neðan.

Seinna tilvikið var ekki eins alvarlegt en þá klessti Franco Colapinto, nýliði Alpine, bílinn sinn.