Varar við framtíðarreikningum í nafni barnsins

Björn Berg var gestur þeirra Hrefnu Bjarkar Sverrisdóttur og Arnars Þórs Ólafssonar í hlaðvarpinu Viltu finna milljón? á dögunum. Þar sagðist hann alls ekki ráðleggja foreldrum að stofna framtíðarreikning í nafni barna sinna.

„Ég er ekki hrifinn af því að þetta sé á kennitölu barnsins,“ segir hann.

Foreldrarnir ráði

Það sé vegna þess að hann vilji að foreldrarnir ráði og ekki bara upp að átján ára afmælisdegi barnsins. Hann biður foreldra um að velta því alvarlega fyrir sér hvort barnið þeirra sé raunverulega tilbúið til að sýsla með slíkar upphæðir átján ára gamalt.

„Átján ára erum við orðin fjárráða, framtíðiarreikningurinn losnar og mamma og pabbi hafa ekkert um neitt að segja. Og ég hef séð nógu mörg dæmi þar sem fjölskyldan hafði verið aðsafna í átján ár svo er þessi peningur farinn á nokkrum dögum,“ segir hann.

Einstakt forskot

Hann segist hvetja fólk til að gera samning við barnið sitt, spyrja barnið hvort það átti sig á því hvers lags forskot það er að fá að vinna á fullu samhliða námi og búa ókeypis inni á foreldrum sínum og þurfa ekki að greiða fyrir mat eða aðrar lífsnauðsynjar.

„Þá segir maður: Ég ætla að gera við þig samning. Núna ætlar þú að reyna að eyða engu. Þú færð bara að vera hérna og sjá um það sem er nauðsynlegt. Þú ert bara duglegur í skólanum og vinnur og vinnur. Þú leggur fyrir svona mikið á mánuði. Ef þú gerir það í svona langan tíma áttu fimm milljónir,“ segir Björn.

„Ef þú gerir þetta skulum við matsja þig og gefa þér aðrar fimm milljónir. Krakkinn veit ekkert að þetta er peningur sem búið er að vera safna allan tímann en þarna er gulrótin komin. Krakkinn mun safna og verða fjárhagslega sjálfstæður. Ef þú gerir þetta ekki og þessi sami peningur liggur inn á bankabók er engin samningsstaða. Engin,“ segir Björn Berg Gunnarsson fjármálaráðgjafi.