Viðskipti innlent

Ingunn ráðin fram­kvæmda­stjóri Auðnu

Kolbeinn Tumi Daðason skrifar
Ingunn Sigurpálsdóttir er tekin við starfi forstjóra.
Ingunn Sigurpálsdóttir er tekin við starfi forstjóra.

Auðna tæknitorg hefur ráðið Ingunni Sigurpálsdóttur í starf framkvæmdastjóra fyrirtækisins. Hún tekur við starfinu af Einar Mäntylä sem kom að stofnun Auðnu á árinu 2019 og hefur setið í forstjórastól síðan. Þetta kemur fram í tilkynningu frá Auðnu.

Ingunn hefur starfað sem markaðs- og fjármálastjóri Auðnu og tók við starfi forstjóra þann 1. maí. Það segir í tilkynningunni að hún muni leiða áframhaldandi uppbyggingu og þróun starfsemi Auðnu, sem gegni lykilhlutverki í íslensku nýsköpunar- og rannsóknarumhverfi með því að aðstoða háskóla- og vísindasamfélagið við að skila uppfinningum og hagnýtanlegum rannsóknarniðurstöðum til samfélagsins í formi lausna, verðmætasköpunar og aukninnar samkeppnishæfni.

Ingunn er í tilkynningunni sögð búa yfir víðtækri og fjölbreyttri reynslu af stjórnun, markaðsstarfi og fjármálum úr íslensku atvinnulífi, sem hafi veitt henni dýrmæta innsýn í það hvernig styðja megi við frumkvöðla, efla samstarf og stuðla að árangri í nýsköpunarumhverfi. 

Ingunn er með grunngráðu í rekstrarverkfræði frá Háskólanum í Reykjavík og hefur sótt frekari þekkingu með sérhæfðum námskeiðum í verkefnastjórnun, stafrænum markaðsmálum og viðburðastjórnun.

„Það er bæði mikill heiður og spennandi áskorun að taka við starfi framkvæmdastjóra Auðnu tæknitorgs,“ segir Ingunn. 

„Félagið hefur á undanförnum árum byggt upp mikilvæga innviði sem styðja við nýsköpun á Íslandi og ég hlakka til að vinna með frábæru teymi og samstarfsaðilum til að efla þetta starf enn frekar.“

Um Auðnu tæknitorg

Auðna tæknitorg er kjarnastofnun í íslensku nýsköpunarumhverfi sem stuðlar að því að rannsóknaniðurstöður, hugverk og þekking nýtist atvinnulífinu og samfélaginu. Meðal verkefna Auðnu eru stuðningur við frumkvöðla, sérfræðinga og fyrirtæki, ráðgjöf um hugverkaréttindi og viðskiptaþróun, auk aukinnar tengingar við alþjóðlega fjárfesta og markaði. 






Fleiri fréttir

Sjá meira


×