Getur frelsað El Salvador-fangann en vill það ekki

Þetta sagði Trump í viðtali við ABC News en þar staðhæfði hann einnig ranglega að Garcia væri með „MS-13“ nafn alræmds gengis flúrað á hendi sína.

Garcia var meðal hóps manna sem var fluttur í alræmt fangelsi í El Salvador og hafa embættismenn viðurkennt að það hafi verið fyrir mistök. Dómari hafði þá gefið út að ekki ætti að senda hann úr landi en síðan þá hefur tónninn frá Hvíta húsinu breyst og hefur Garcia verið málaður sem harðsvíraður glæpamaður eða jafnvel hryðjuverkamaður.

Eftir að mál Garcia jók meiri athygli var hann færður úr alræmda fangelsinu sem hann var upprunalega sendur í og í annað fangelsi.

Í frétt Wall Street Journal er haft eftir forsvarsmönnum mannréttindasamtaka að herför Nayib Bukele, forseta El Salvador, gegn glæpagengjum hafi leitt til þess að margir ungir menn með húðflúr, sem hafi ekki verið meðlimir í glæpasamtökum, hafi endað í fangelsi.

Sjá einnig: Þúsundir meintra glæpamanna flutt í risafangelsi

Trump og embættismenn hans, auk Nayib Bukele, forseta El Salvador, hafa allir haldið því fram að ómögulegt sé að koma Garcia aftur til Bandaríkjanna. Trump hefur sagt að hann hafi ekki vald til að frelsa hann í El Salvador og Bukele segist ekki hafa vald til að senda hann til Bandaríkjanna.

Það var þar til í fyrradag, þegar Trump viðurkenndi að hann gæti komið Garcia aftur til Bandaríkjanna. Hann sagðist þó ekki vilja gera það, því hann teldi Garcia glæpamann.

„Ef hann væri herramaðurinn sem þú segir að hann sé, gæti ég gert það. Hann er það ekki.“

Trump hélt því einnig fram að Garcia hefði gengið í skrokk á eiginkonu sinni. Hún fór fram á vernd frá honum árið 2021 og hélt því fram að hann hefði ráðist á hana nokkrum sinnum. Eiginkona Garcia, Jennifer Vasquez Sura segist þó hafa hætt að fylgja málinu eftir. Þau hafi „unnið í gegnum ástandið eins og fjölskylda“ og leitað ráðgjafar, eins og farið er yfir í grein BBC.

Karoline Leavitt, talskona Trumps, hefur einnig sakað Garcia um þátttöku í mansali. Er það á grunni þess að hann var færður í hald lögreglu í Tennessee árið 2022 eftir að hann var stoppaður fyrir of hraðan akstur.

Þá voru átta aðrir menn með honum í bílnum og enginn með farangur og grunaði lögregluþjóninn sem stöðvaði hann að um mansal væri að ræða. Hann var þó ekki ákærður

Eiginkona Garcia hefur bent á að Garcia hafi unnið við smíðar og hafi oft keyrt aðra menn milli vinnustaða.

Hefur aldrei verið dæmdur

Abrego Garcia er frá El Salvador en fór ólöglega inn í Bandaríkin árið 2012. Hann var handtekinn í mars 2019 í umdeildu máli þar sem hann var sakaður um glæpastarfsemi en ekki dæmdur fyrir neinn glæp, eins og fram kemur í grein New York Times.

Í október 2019 komst dómari að þeirri niðurstöðu að ekki ætti að vísa honum aftur til El Salvador þar sem honum átti að stafa ógn af glæpagengjum þar.

Hann var þó handtekinn aftur í mars á þessu ári, sakaður um að vera meðlimur MS-13 og fluttur í mjög umdeilt fangelsi í El Salvador.

Garcia var aldrei færður fyrir dómara áður en hann var fluttur úr landi, eins og lögin og stjórnarskrá Bandaríkjanna segja til um. Hann hefur þar að auki aldrei verið ákærður eða dæmdur fyrir að vera meðlimur í glæpagengi.

Árið 2019 voru lagðar fram meint sönnunargögn um að Garcia tilheyrði MS-13 en dómarar hafa dregið trúverðugleika þeirra verulega í efa. Einn sagði þau eingöngu byggja á því að hann hafi verið í hettupeysu og á óljósum ásökunum frá ónefndum heimildarmanni um að Garcia hafi tilheyrt afsprengi MS-13 í New York, þó hann hafi aldrei búið þar.

Virðist telja breytta mynd raunverulega

Hvíta húsið hefur áður deilt mynd af Trump halda á mynd af húðflúrum Garcia á fingrum hans, þar sem búið var að bæta við „MS-13“ fyrir ofan húðflúrin, sem áttu þá að tákna nafn glæpasamtakanna.

Sérfræðingar hafa dregið í efa að húðflúrin, sem eru af kannabislaufi, látnum broskalli, krossi og höfuðkúpu, tákni í raun MS-13.

Í viðtalinu virtist Trump þó standa í þeirri trú að „MS-13“ sem starfsmenn hans bættu við myndina, hafi verið raunverulegt.

Hluta viðtalsins þar sem rætt var um málefni innflytjenda og Garcia má sjá hér að neðan.