Á­nægju­legt að breið sátt liggi fyrir um upp­gjör vegna ÍL-sjóðs

Alls samþykktu 81 prósent kröfuhafa að ganga að tillögu nefndar fjármála- og efnahagsráðherra um uppgjör á skuldum ÍL-sjóðs.

Lífeyrissjóðirnir og aðrir kröfuhafar funduðu með stjórnvöldum í dag á Hilton Nordica í dag um tillögur sem mótaðar voru af bæði nefnd ráðherra, í henni sátu fulltrúar frá ráðuneyti og lífeyrissjóðum.

„Það hefur þá þýðingu að nú getur þingið tekið málið til efnislegrar meðferðar. Það þarf fjáraukalög og samþykki í þinginu til þess að það sé hægt að ganga til þessara viðskipta og skipta út þeim skráðu skuldabréfum sem Íbúðalánasjóður, eins og þú sagðir, réttilega gaf út á sínum tíma, 2004,“ segir Ólafur Sigurðsson framkvæmdastjóri Birtu lífeyrissjóðs um ákvörðun lífeyrissjóðanna að ganga að tillögu nefndar fjármála- og efnahagsráðherra um uppgjör á skuldum ÍL-sjóðs.

Ólafur segir að með þessari ákvörðun sé töluverðri óvissu eytt.

„Í sjálfu sér ánægjulegt að það liggi þá fyrir nokkuð breið sátt.“

Afrakstur viðræðna sem hófust fyrir ári

Í tilkynningu frá stjórnarráðin um málið kemur fram að í dag hafi verið haldinn fundur skuldabréfaeigenda ÍL-sjóðs í flokkunum HFF34 og HFF44. Á fundinum hafi verið lögð fram tillaga að skilmálabreytingu bréfanna sem heimili útgefanda að gera bréfin upp með afhendingu tiltekinna eigna.

Í tilkynningu stjórnarráðsins segir að tillagan sé niðurstaða rúmlega eins árs viðræðna ráðgjafa 18 lífeyrissjóða, sem saman fara með meirihluta skulda sjóðsins, og viðræðunefndar fjármála- og efnahagsráðherra.

Alls hafi 81,4 prósent eigenda að kröfufjárhæð sem greiddu atkvæði á fundinum um HFF34 flokkinn, samþykkt tillöguna og 81,6 prósent eigenda að kröfufjárhæð sem greiddu atkvæði á fundinum um HFF44 flokkinn. Tillagan teljist því bindandi fyrir alla eigendur.

Ráðherra hrósar og þakkar

Þá kemur einnig fram í tilkynningunni að fyrr í vikunni hafi verið birt frumvarp til fjáraukalaga og að ef það verði samþykkt á þingi hafi ráðherra nauðsynlegar heimildir Alþingis til að hægt sé að ganga til uppgjörs í samræmi við tillöguna sem er forsenda þess að mögulegt sé að slíta ÍL-sjóði.

Samkvæmt tillögunni er gert ráð fyrir að útgefandi tilkynni kröfuhafa með sjö daga fyrirvara að lágmarki ef hann ákveður að nýta heimild til uppgjörs. Þann 14. júní 2025 fellur tillagan úr gildi.

„Ég fagna ákvörðun skuldabréfaeigenda, sem í flestum tilfellum eru lífeyrissjóðir landsins, um að samþykkja þetta tilboð um að ljúka uppgjöri ÍL-sjóðs. Þá vil ég nota tækifærið til þess að hrósa og þakka öllum aðilum málsins fyrir að hafa leyst þetta flókna úrlausnarefni og komast að sameiginlegri niðurstöðu íslensku samfélagi til heilla,“ segir Daði Már Kristófersson, fjármála- og efnahagsráðherra, að lokum.