Ríf­lega tveggja milljarða af­gangur á Akur­eyri

Þetta segir í tilkynningu Akureyrarbæjar til Kauphallar um að árseikningar sveitarfélagsins hafi verið lagðir fram í bæjarráði í dag. Þar segir meðal annars að sjóðstreymi hafi verið betra en árið áður og að veltufé sem hlutfall af tekjum sé gott, eða 15,13 prósent.

Auknar tekjur frá Jöfnunarsjóði og þjónustu

Samstæða Akureyrarbæjar, það er Aðalsjóður, Fasteignir Akureyrarbæjar, Eignasjóður gatna og Umhverfismiðstöð ásamt fyrirtækjum í eigu bæjarins, svo sem Félagslegum íbúðum, Strætisvögnum Akureyrar, Hlíðarfjalli, Hafnasamlagi Norðurlands og Norðurorku, hafi verið rekin með 2.218 milljóna króna afgangi. 

Rekstur samstæðu Akureyrarbæjar hafi því gengið mun betur en áætlun hafi gert ráð fyrir því í fjárhagsáætlun hefði verið gert ráð fyrir 436 milljóna króna jákvæðri niðurstöðu. Rekstrarniðurstaða samstæðunnar fyrir fjármagnsliði og tekjuskatt hafi verið jákvæð um 3.987 milljónir króna en áætlun hefði gert ráð fyrir 2.853 milljóna króna rekstrarafgangi. 

„Meginskýringar á bættri afkomu eru áhrif lækkandi verðbólgu á árinu, hófleg hækkun lífeyrisskuldbindinga ásamt nokkurri hækkun tekna frá Jöfnunarsjóði og þjónustutekna, einkum hjá hafnasamlagi og veitum.“

Tæplega tuttugu milljarðar í launagreiðslur

Samkvæmt yfirliti um sjóðstreymi hafi veltufé frá rekstri numið 5.736 milljónum króna, sem sé 766 milljónum krónum hærra en áætlað var. Sambærileg fjárhæð árið áður hafi verið 5.281 milljónir króna. 

Handbært fé frá rekstri hafi numið 5.588 milljónum króna. Fjárfestingahreyfingar hafi numið samtals nettó 5.043 milljónum króna en fjármögnunarhreyfingar hafi numið samtals nettó -160 milljónum króna. Afborgun langtímalána hafi numið 1.576 milljónum króna. Ný langtímalán hafi verið tekin fyrir 800 milljónir króna hjá Norðurorku. Hækkun á handbæru fé á árinu hafi numið 385 milljóna króna og handbært fé samstæðunnar í árslok hafi verið 2.951 milljónir króna. Veltufé frá rekstri árið 2024 í hlutfalli við tekjur hafi numið 15,13 prósentum í samstæðunni og 9,54 prósentum í A-hluta. Árið áður hafi hlutföllin verið 15,35 prósent í samstæðunni og 9,75 prósent í A-hluta.

Heildarlaunagreiðslur með launatengdum gjöldum en án hækkunar lífeyrisskuldbindinga hjá samstæðunni hafi verið 19.710 milljónir króna. Fjöldi stöðugilda hafi að meðaltali verið 1.530, sem sé fjölgun um 46 stöðugildi frá árinu áður. Laun og launatengd gjöld ásamt lífeyrisskuldbindingum samstæðunnar í hlutfalli við rekstrartekjur hennar hafi verið 52,9 prósent. Annar rekstrarkostnaður hafi verið 30,8 prósent af rekstrartekjum. Skatttekjur og framlög úr Jöfnunarsjóði sveitarfélaga hafi verið 1,238 milljónir króna á hvern íbúa en tekjur samtals 1,891 milljónir króna á hvern íbúa. Árið 2023 hafi skatttekjurnar verið 1,138 milljónir króna á hvern íbúa og heildartekjurnar 1,737 milljónir króna á hvern íbúa.

Gerðu ráð fyrir halla en fengu afgang

Niðurstaða rekstrar A-hluta hafi verið jákvæð um 834 milljónir króna en fjárhagsáætlun hafi gert ráð fyrir neikvæðri niðurstöðu um 632 milljónir króna.

Samkvæmt efnahagsreikningi hafi eignir sveitarfélagsins í árslok 2024 verið bókfærðar á 72,304 milljarða króna en þar af hafi veltufjármunir verið 7.537 milljónir króna. Skuldir sveitarfélagsins með lífeyrisskuldbindingum hafi samkvæmt efnahagsreikningi numið 41,770 milljarðar króna en þar af hafi skammtímaskuldir verið 6,845 milljarðar króna.

„Fjárhagur Akureyrarbæjar er mjög traustur og nam skuldaviðmið samstæðunnar í árslok 75% samkvæmt reglum Eftirlitsnefndar með fjármálum sveitarfélaga en var 80% árið áður. Skuldaviðmið í A-hluta var 54% í árslok en var 56% árið áður.“

Veltufjárhlutfallið hafi verið 1,10 í árslok 2024 en hafi verið 1,17 árið áður. Bókfært eigið fé hafi numið 30,534 milljörðum króna í árslok en hafi verið 27,023 milljarða króna í árslok árið áður. Eiginfjárhlutfall hafi verið 42 prósent af heildarfjármagni á móti 40 prósentum árið áður.