Ekkert breyst nema fylgi flokkanna

Þetta segir Dóra Björt í samtali við fréttastofu um tíðindi kvöldsins en Einar tilkynnti í kvöld að hann hafi ákveðið að slíta meirihlutasamstarfi Framsóknar, Samfylkingar, Pírata og Viðreisnar og vísaði hann sérstaklega í deilur um framtíð Reykjavíkurflugvallar. Hann ætli sér að taka upp viðræður við Sjálfstæðisflokk, Flokk fólksins og Viðreisn um myndun nýs meirihluta.

„Það er leitt að sjá að Einar og Framsóknarflokkurinn sjái sér ekki fært að standa við meirihlutasáttmálann og vinna samkvæmt honum í í þágu borgarbúa þar sem hann inniheldur mjög mörg metnaðarfull verkefni,“ segir Dóra Björt.

„Við höfum auðvitað komið á sögulegum samgöngusáttmála sem mun verulega breyta lífsgæði allra íbúa á höfuðborgarsvæðinu. Við höfum unnið að því nútímavæða þjónustu við borgarbúa, við höfum komið rekstrinum yfir núll. Við höfum virkilega látið til okkar taka með góðum verkum.“

Vonar að óvissuástandið vari sem styst

Hún segir orð Einars hafa komið sér á óvart. „Mér finnst sérstakt að segja að þú getir ekki komið hlutum í verk í embætti borgarstjóra því að það er valdamesta embætti borgarinnar. Við höfum sannarlega komið mjög mörgu í verk og ég hef áhyggjur af því að þessar vendingar spilli fyrir mikilvægum málum og verkefnum. Eins og uppbyggingu fyrir heimilislausa, að gera borgina öruggari fyrir börn með stórfelldri uppbyggingu göngustíga sem við vorum búin að ákveða og öðrum brýnum og mikilvægum verkefnum. Þannig að ég vona að þessa óvissuástand vari sem skemmst. Svona rót og upplausn vinnur gegn því að verkefni vinnist hratt og vel.“

Ekkert breyst nema fylgi flokkanna

Dóra Björt segir að þessi vika hafi um margt verið sérstök. „Já að einhverju leyti. Við vorum með erfiðan borgarstjórnarfund á þriðjudaginn þar sem við fjölluðum um flugvöllinn sem við höfum áður gert. Það hefur legið fyrir og það hefur verið vísað í það sem deilumál og þrætuepli, en mér fannst allt of mikið gert úr því. Þessi skoðanamunur hefur hins vegar legið fyrir frá upphafi þessa meirihlutasamstarfs og mér fannst hann snyrtilega afgreiddur í meirihlutasáttmála. Það hefur ekkert breyst í þessum efnum nema kannski fylgi flokkanna. Ég hef persónulega lagt meiri áherslu á að koma hlutum í verk en að hafa áhyggjur af skoðanakönnunum.“

Um fundinn í kvöld segir Dóra að hún hafi vitað að það væri titringur en að hún hafi ekki átt von á þessum tíðindum. „Ég hélt að við værum að fara að ræða málin og næstu úrlausnarefni. Ég átti ekki von á þessu. Þetta kom mér í opna skjöldu. Ekki það sem ég var að búast við.

Ég vön að starfa í meirihluta af heilindum og standa við gerða samninga. Ég hafði hugsað mér að klára þetta kjörtímabil og vinna að okkar góðu og metnaðarfullu verkefnum í þágu borgarbúa. Það er leitt að aðrir hafi ekki séð sér fært að klára þau mikilvægu verk.