Skagi skráð sem form­legt nafn sam­stæðunnar

Þetta kemur fram í tilkynningu. Þar segir að móðurfélag samstæðunnar hafi undanfarin misseri verið starfrækt undir nafni Vátryggingafélags Íslands hf. en fái nú nafnið Skagi í kjölfar þess að tryggingarekstur var færður í dótturfélag í upphafi árs. Þetta sé lokahnykkur í þeirri vegferð að koma samstæðu Skaga í sitt framtíðarhorf.

„Við sameiningu VÍS og Fossa fjárfestingarbanka árið 2023 hófst umbreytingarferli félaganna í öfluga fjármálasamstæðu. Framtíðarfyrirkomulag samstæðunnar, sem var kynnt þá, gerði ráð fyrir móðurfélagi og þremur öflugum dótturfélögum; VÍS tryggingum hf., Fossum fjárfestingarbanka hf. og SIV eignastýringu. Á síðasta ári gekk Skagi frá kaupum á Íslenskum verðbréfum og sameinast nú starfsemi eignastýringar undir nafni Íslenskra verðbréfa. Nafnið Skagi hefur nú verið skráð formlega fyrir móðurfélagið, sem undirstrikar skýrleika og stefnumótun félagsins til framtíðar,“ segir í tilkynningunni. 

Haft er eftir Haraldi Þórðarsyni, forstjóri Skaga, að félagið hafi unnið markvisst að samþættingu starfseminnar með það að markmiði að skapa aukið virði fyrir viðskiptavini, hluthafa og samfélagið í heild. „Skráning nafnsins er mikilvægur áfangi í þeirri vegferð. Nafnið Skagi endurspeglar þá sameinuðu krafta sem við höfum byggt upp innan samstæðunnar og styrkir stöðu okkar á fjármála- og tryggingamarkaði.“

Vaxandi eignastýring og sterkari markaðsstaða

Í tilkynningunni segir að sameinað félag SIV eignastýringar og ÍV sjóða muni hljóta nafnið Íslensk verðbréf og til veðri öflugt eigna- og sjóðastýringarfélag sem byggi á traustum grunni og reynslumiklum hópi sérfræðinga. 

„Góður vöxtur hefur verið í eignastýringu innan Skaga og á síðasta ári nær tvöfölduðust eignir í stýringu innan samstæðunnar. Íslensk verðbréf hafa upp á að bjóða fjölbreytt úrval fjárfestingakosta fyrir jafnt almenna fjárfesta sem og fagfjárfesta.

Áframhaldandi markviss vöxtur Fossa

Fossar fjárfestingarbanki hefur á undanförnum árum tekið markviss skref til að vaxa inn í hlutverk leiðandi og sérhæfðs fjárfestingarbanka á Íslandi. Bankinn hefur notið þess að vera hluti af fjárhagslega sterkri samstæðu Skaga sem hefur stutt við vöxt bankans auk þess sem mikil tækifæri hafa skapast í bæði kostnaðar- og tekjusamlegð innan samstæðunnar. Ennfremur hefur bankinn átt greitt aðgengi að markaðsfjármögnun á skuldabréfamarkaði á samkeppnishæfum kjörum sem hefur stutt við vöxt á bankastarfsemi Fossa,“ segir í tilkynningunni.