Litlar breytingar á þorski í stofn­mælingu Haf­ró

Yngsti árgangur þorsks mældist undir meðalstærð í fjölda en eins árs þorskur var aftur á móti nálægt langtímameðallagi. Meðalþyngdir flestra árganga þorsks mældust undir meðaltai áranna 1996 til 2024, að því er kemur fram í skýrslu Hafrannsóknastofnunar um mælinguna. Hún er að hluta til grundvöllur árlegrar ráðgjafar stofnunarinnar til ráðherra um aflamark næsta fiskveiðiárs.

Stofnvísitala ýsu er sögð áfram há líkt og síðustu tvö ár á undan. Það sýni hraða stækkun stofnsins í kjölfar góðrar nýliðunar. Þriggja til fimm ára ýsa mælist yfir meðalstærð en þriggja ára og yngri undir meðalstærð í fjölda.

Meðalþyngdir flestra annarra árganga annarra tegunda mælast einnig undir meðaltali. Vísitala grálúðu er sögð langt undir langtímameðaltali en vísbendingar um bætta nýliðun. Gullkarfi hefur lækkað frá því í fyrra en djúpkarfi mældist hærri en síðustu tvö árin á undan. Vísitala usa er undri langtímameðaltali og blálöngu sömuleiðis. Gulllax mælist hins vegar hár og langt yfir meðaltali frá 1996.

Vísitala ýmissa kaldsjávartegunda er sögð halda áfram að lækka og áberandi lág í nokkrum tegundum.

Fram kemur í skýrslu Hafró að botnhiti sjávar á grynnstu stöðvum, hundrað til tvö hundruð metra dýpi, hafi hækkað fyrir vestan og sunnan landið. Hann hafi hins vegar lækkað fyrir norðvestan og norðaustan. Greina megi lítilsháttar hækkun meðalhita við botn í köldum djúpsjó, á meira en fjögur hundruð metra dýpi, fyrir norðvestan og norðaustan land.