„Þið hafið efni á þessari kaup­hækkun, borgið hana núna“

Fulltrúar stéttarfélagsins Unite the Union komu hingað til lands í gær, til þess að reyna að ná tali af Lýði og Ágústi Guðmundssonum, sem oft hafa verið kallaðir Bakkavararbræður, og Sigurði Valtýssyni. Ástæðan er kjaradeila starfsmanna í samlokuverksmiðju í eigu Bakkavarar við vinnuveitendur sína. Þremenningarnir fara saman með rúmlega helmingshlut í Bakkavör.

„Félagar okkar eru í verkfalli í einni verksmiðjunni þeirra í Spalding á Englandi. Þeir fara fram á sanngjarna kauphækkun sem þeir eiga fyllilega skilið. Fyrirtækið hefur efni á því,“ segir Sam Luczynski, skipuleggjandi hjá Unite the Union.

Um rúmlega 500 starfsmenn sé að ræða, sem hafi verið í verkfalli sleitulaust síðan seint í september. Krafan sé launahækkun sem myndi samtals nema um tveimur prósentum af hagnaði félagsins á síðasta ári, þannig að um tvö þúsund króna laun á tímann myndu hækka um tæpar 150 krónur. Sex vikna verkfall starfsmanna virðist ekki duga til að fá þær kröfur uppfylltar.

„Við komum hingað til að ná athygli þeirra og til að öllum hér verði ljóst hvers konar menn þetta eru. Þeir velja núna að veita ekki þessa kauphækkun en í staðinn borga þeir sér háar arðgreiðslur á hverju ári.“

Stéttarfélagið hefur víða varpað upp skilaboðum vegna málsins, sem einkum er beint að bræðrunum tveimur, á stöðum nálægt fasteignum í þeirra eigu.

„Það er til að ná athygli þeirra og segja: Við vitum hvar hagsmunir ykkar eru. Komið að samningaborðinu og gerið okkur tilboð sem félagar okkar geta sætt sig við,“ segir Sam.

Enn hafi ekki gengið að fá bræðurnar til viðræðna, þrátt fyrir bréf sem leiðtogi stéttarfélagsins ritaði þeim í síðustu viku. Fulltrúar stéttarfélagsins séu þó vongóðir um að brátt náist ásættanleg niðurstaða í málið.

„Við viljum að starfsmennirnir fari aftur að vinna fyrir laun sem þeir verðskulda. Þeir vilja ekki vera í verkfalli og við viljum ekki vera hér.“

Í október sendi Bakkavör frá sér yfirlýsingu þar sem vonbrigðum var lýst með verkfallsaðgerðirnar og þá staðreynd að verkalýðsfélagið hefði hvatt 400 starfsmenn til að fara í verkfall, þrátt fyrir tilboð um launahækkanir umfram verðbólgu. Samningar hefðu náðst um laun á tuttugu öðrum starfsstöðvum félagins í Bretlandi.

Sam segir herferðina þó munu standa eins lengi og þörf krefur, og er með einföld skilaboð til Bakkavarar:

„Þið hafið efni á þessari kauphækkun, borgið hana núna.“